काठमाडौँ, मंसिर २—
नेपाल प्रिमियर लिग (एनपीएल)को दोस्रो संस्करण आज झनै रोमाञ्चक बन्दैछ, कारण—कीर्तिपुरस्थित त्रिवि अन्तर्राष्ट्रिय क्रिकेट मैदानमा दुई ठूला प्रतिस्पर्धात्मक खेल हुँदैछन्। सोमबार विजयी सुरुआत गरेको काठमाडौँ गोर्खाजको प्रभावपछि आज मैदान उत्रने चार टोलीमा अतिरिक्त ऊर्जा र दबाब दुवै छ।
पहिलो खेल : चितवन राइनोज बनाम कर्णाली याक्स — बिहान ११:४५ बजे
पहिलो भिडन्तमा कुशल मल्ल को कप्तानीमा उत्रने चितवन राइनोज र सोमपाल कामी नेतृत्वको कर्णाली याक्स आमनेसामने हुनेछन्।
दुवै टोली आजकै खेलबाट लिगमा बलियो सुरुआत गर्ने लक्ष्यका साथ मैदानमा झर्नेछन्। चितवन र कर्णाली दुवै टोली युवा ऊर्जा, छिटो रनरेट र तीव्र बलिङका लागि चर्चित भएकाले पहिलो खेल दर्शकलाई रोमाञ्चक हुने अपेक्षा।
दोस्रो खेल : विराटनगर किङ्ग्स बनाम पोखरा एभेन्जर्स
दोस्रो खेलमा सन्दीप लामिछाने को कप्तानीमा रहेको विराटनगर किङ्ग्स र कुशल भुर्तेल नेतृत्वको पोखरा एभेन्जर्स भिड्दैछन्।
दुवैले यसपटकको एनपीएलमा नयाँ रणनीति, नयाँ संयोजन र नयाँ मनोबलका साथ मैदानमा उत्रने तयारी गरेका छन्।
साविक विजेता जनकपुर बोल्ट्स चकित—काठमाडौँ गोर्खाजको उत्कृष्ट सुरुआत
प्रतियोगिताको पहिलो दिनमै काठमाडौँ गोर्खाजले साविक विजेता जनकपुर बोल्ट्स लाई पाँच विकेटले पराजित गर्दै अङ्कतालिकामा पहिलो दुई अंक जोडिसकेको छ। यसले आजका चार टोलीलाई थप दवाबसहित प्रेरणा पनि दिएको छ।
बम्पर पुरस्कार र कडा प्रतिस्पर्धा
नेपाल क्रिकेट सङ्घ (क्यान)को आयोजनामा मंसिर १ देखि सुरु भएको एनपीएल मंसिर २७ मा फाइनल का साथ सम्पन्न हुनेछ।
विजेताले रु. १ करोड १० लाख हात पार्ने व्यवस्था रहेकाले सबै टोली सर्वश्रेष्ठ प्रदर्शनका लागि जुझारु रूपमा मैदानमा उत्रिएका छन्।
-
Jigyasanepal
