काठमाडौं, जेठ १९ — रोयल च्यालेन्जर्स ब्यांग्लोर (आरसीबी) ले लगातार दोस्रोपटक इन्डियन प्रिमियर लिग (आईपीएल) को उपाधि जित्दै आफ्नो दबदबा कायम राखेको छ। आइतबार राति सम्पन्न फाइनल खेलमा गुजरात टाइटन्सलाई ५ विकेटले पराजित गर्दै ब्यांग्लोरले उपाधि रक्षा गर्न सफल भएको हो।
अहमदाबादस्थित नरेन्द्र मोदी स्टेडियममा भएको फाइनलमा गुजरातले दिएको १५६ रनको लक्ष्य ब्यांग्लोरले १८ ओभरमै ५ विकेट गुमाएर पूरा गर्यो। जितका लागि कप्तानी पारी खेलेका स्टार ब्याट्सम्यान विराट कोहली ४२ बलमा ९ चौका र ३ छक्कासहित अविजित ७५ रन बनाएर टोलीलाई विजयी गन्तव्यसम्म पुर्याए।
वैभव अरोराले ३२ रनको योगदान दिँदा टिम डेभिडले २४ र कप्तान रजत पाटिदारले १५ रन जोडे। जितेश शर्मा ११ रनमा अविजित रहे।
यसअघि टस हारेर ब्याटिङ गरेको गुजरात टाइटन्सले निर्धारित २० ओभरमा ८ विकेट गुमाएर १५५ रन बनाएको थियो। गुजरातका लागि वासिङटन सुन्दरले अविजित ५० रनको अर्धशतकीय पारी खेले पनि टोलीलाई उपाधि दिलाउन सकेनन्। निशान्त सिन्धुले २०, जस बटलरले १९ तथा अर्शद खानले १५ रन जोडे।
गुजरातका कप्तान शुभमन गिल १० रन र ओपनर साइ सुदर्शन १२ रनमै आउट भएपछि टोली दबाबमा परेको थियो।
ब्यांग्लोरका बलरहरू पनि उत्कृष्ट लयमा देखिए। रसिक सलाम, जस हेजलवुड र भुवनेश्वर कुमारले समान २–२ विकेट लिए भने क्रुनाल पाण्ड्याले १ विकेट हात पारे।
यसअघि पहिलो क्वालिफायरमा पनि गुजरातलाई ९२ रनले पराजित गरेको ब्यांग्लोरले फाइनलमा समेत आफ्नो उत्कृष्ट प्रदर्शन दोहोर्याउँदै लगातार दोस्रोपटक आईपीएलको ट्रफी उचाल्न सफल भयो। गत सिजन १८ वर्षको प्रतीक्षा अन्त्य गर्दै पहिलोपटक च्याम्पियन बनेको ब्यांग्लोरले यस वर्ष पनि सशक्त प्रदर्शनसहित उपाधि जोगाएर नयाँ इतिहास रचेको छ।
विराट कोहलीको चम्किलो प्रदर्शन र समग्र टोलीको सन्तुलित खेलका कारण आरसीबीले आईपीएलमा लगातार दोस्रो वर्ष पनि आफूलाई सर्वश्रेष्ठ सावित गरेको छ।
-
Jigyasanepal
