काठमाडौं, असोज १० – निर्वाचन आयोगले मंसिर १६ गते हुने उपनिर्वाचनको लागि निर्वाचन कार्यक्रम सार्वजनिक गरेको छ।

आयोगका अनुसार उम्मेदवारको मनोनयन दर्ता मंसिर २ गते बिहान १० बजेबाट सुरु भई साँझ ५ बजेसम्म निर्वाचन अधिकृतको कार्यालयमा गरिनेछ। मनोनयन दर्ता सकिएपछि साँझ ५ देखि ६ बजेसम्म उम्मेदवारको सूची प्रकाशन गरिनेछ।

मंसिर ३ गते बिहान १० बजेदेखि दिउँसो ३ बजेसम्म उम्मेदवारको विरोधमा उजुरी दिन सकिनेछ। उजुरीको जाँचबुझ र निर्णय मंसिर ४ गते गरिनेछ, जसको परिणाम अनुसार सोही दिन साँझ ५ देखि ६ बजेसम्म अन्तिम सूची प्रकाशन हुनेछ।

उम्मेदवारले मंसिर ५ गते बिहान ९ देखि दिउँसो १ बजेसम्म आफ्नो नाम फिर्ता लिन सक्नेछन्। त्यसपछि दिउँसो १ देखि ३ बजेसम्म अन्तिम सूची प्रकाशन गरी उम्मेदवारलाई निर्वाचन चिह्न प्रदान गरिनेछ।

निर्वाचनको मुख्य दिन मंसिर १६ गते बिहान ७ बजेदेखि बेलुका ५ बजेसम्म मतदान हुनेछ। प्रचारप्रसार निषेध अवधि भने मंसिर १३ गते राति १२ बजेदेखि लागू हुनेछ।

• Jigyasa media