देशका अधिकांश भागमा आंशिक बदली, पहाडी तथा हिमाली क्षेत्रमा छिटपुट वर्षा र हिमपातको सम्भावना

जिज्ञासा नेपाल | मौसम समाचार

काठमाडौं । चक्रवात ‘अर्नब’को अवशेषका रूपमा पश्चिम नेपाल नजिक विकसित न्यून चापीय क्षेत्रको प्रभाव कमजोर हुँदै गएपछि देशभरको मौसम क्रमशः सुधार हुने भएको छ।

माथिल्लो वायुमण्डलमा रहेको पश्चिमी न्यून चापीय प्रणालीको आंशिक प्रभाव भने कायमै रहेकाले केही स्थानमा हल्का वर्षा र हिमपातको सम्भावना रहेको मौसम पूर्वानुमान महाशाखाले जनाएको छ।

महाशाखाका अनुसार आइतबार बिहान लुम्बिनी प्रदेशसहित देशका हिमाली भूभागमा सामान्यतया बादल लागेको छ। अन्य क्षेत्रमा आंशिक बदली रहेको छ। बागमती, गण्डकी, लुम्बिनी र कर्णाली प्रदेशका एक–दुई स्थानमा हल्का वर्षा भइरहेको छ।

आज दिउँसो कस्तो रहला मौसम?

आइतबार दिउँसो देशभर आंशिक बदली रहने पूर्वानुमान छ। हिमाली र पहाडी भूभागका एक–दुई स्थानमा हल्का वर्षा तथा हिमपात हुन सक्ने महाशाखाले जनाएको छ।

त्यस्तै, राति पनि देशभर आंशिक बदली रहनेछ। गण्डकी, कर्णाली र सुदूरपश्चिम प्रदेशका हिमाली तथा पहाडी भूभागका एक–दुई स्थानमा हल्का वर्षा र हिमपातको सम्भावना छ।

तराई र उपत्यकामा बिहान हुस्सु

मौसम सुधार हुँदै गए पनि तराई, उपत्यका तथा खोँचका केही स्थानमा बिहानपख हुस्सु लाग्ने सम्भावना रहेको छ। यसले विशेषगरी बिहानको समयमा सडक तथा हवाई यातायातमा सामान्य प्रभाव पार्न सक्ने भएकाले आवश्यक सतर्कता अपनाउनुपर्नेछ।

यसअघि अर्नब चक्रवातको अवशेषका कारण देशका विभिन्न भागमा वर्षा र हिमपात भएको थियो। न्यून चापीय क्षेत्रको प्रभाव कमजोर भएसँगै अब वर्षाको तीव्रता घट्दै मौसम क्रमिक रूपमा सामान्य अवस्थामा फर्किने अपेक्षा गरिएको छ।