दिउँसो जनकपुर बोल्ट्स र काठमाडौं गोर्खाज भिड्दै, साँझ कर्णाली याक्स र विराटनगर किंग्स आमनेसामने

जिज्ञासा नेपाल | खेलकुद समाचार

काठमाडौं । नेपाल प्रिमियर लिग (एनपीएल) क्रिकेटमा आज दुई खेल हुँदैछन्। कीर्तिपुरस्थित त्रिवि क्रिकेट मैदानमा दिउँसो जनकपुर बोल्ट्स र काठमाडौं गोर्खाजबीच प्रतिस्पर्धा हुनेछ भने साँझ कर्णाली याक्स र विराटनगर किंग्स भिड्नेछन्।

दिनको पहिलो खेल दिउँसो १२ः३० बजे सुरु हुनेछ। प्रतियोगितामा पहिलो खेलमै पराजय बेहोरेको जनकपुर आज जित निकाल्दै पुनरागमन गर्न चाहन्छ। काठमाडौं गोर्खाज भने यस सिजनको पहिलो खेल खेल्दै प्रतियोगिताको सुरुवात जितबाट गर्ने योजनामा मैदान उत्रनेछ।

जनकपुर आफ्नो पहिलो खेलमा कर्णाली याक्ससँग १९ रनले पराजित भएको थियो। कर्णालीले दिएको १३३ रनको लक्ष्य पछ्याएको जनकपुर ११३ रनमै समेटिएको थियो। त्यसैले जनकपुरका लागि आजको खेल अंक जोड्ने र टोलीको मनोबल बढाउने अवसर हुनेछ।

जनकपुरको कप्तानी अमेरिकी अलराउन्डर हरमित सिंहले गरिरहेका छन् भने काठमाडौंको नेतृत्व करण केसीले सम्हाल्नेछन्। दुवै टोलीका खेलाडीको प्रदर्शन र रणनीतिले पहिलो खेलको नतिजा निर्धारण गर्ने अपेक्षा गरिएको छ।

साँझ कर्णाली र विराटनगरबीच प्रतिस्पर्धा

आजको दोस्रो खेल साँझ ५ बजे कर्णाली याक्स र विराटनगर किंग्सबीच हुनेछ। पहिलो खेल जितेको कर्णाली लगातार दोस्रो जित निकाल्ने लक्ष्यमा हुनेछ भने विराटनगर पहिलो हारपछि जितको खोजीमा मैदानमा उत्रनेछ।

कर्णालीले जनकपुरलाई १९ रनले हराउँदै प्रतियोगितामा विजयी सुरुवात गरेको थियो। विराटनगर भने चितवन राइनोजसँग आठ रनले पराजित भएको थियो। चितवनले दिएको १५८ रनको लक्ष्य पछ्याउने क्रममा विराटनगर १४९ रनमै समेटिएको थियो।

कर्णालीको कप्तानी सोमपाल कामीले र विराटनगरको कप्तानी सन्दीप लामिछानेले गर्नेछन्। पहिलो खेलमा जित निकालेको कर्णाली आफ्नो लय कायम राख्न चाहन्छ भने विराटनगरका लागि ब्याटिङ र बलिङ दुवै पक्षमा सुधार गर्दै अंकतालिकामा खाता खोल्ने चुनौती हुनेछ।

आजका दुवै खेलले प्रतियोगिताको सुरुवाती समीकरणलाई थप रोचक बनाउनेछन्। जनकपुर र विराटनगर पहिलो जितको खोजीमा रहँदा काठमाडौं नयाँ अभियान सुरु गर्दैछ भने कर्णाली लगातार दोस्रो जित निकाल्ने लक्ष्यमा हुनेछ।

खेल तालिका