धनगढी । सत्ता साझेदार नेकपा एमालेले केन्द्रमा सरकार लाई आफ्नो समर्थन फिर्ता लिए सँगै प्रदेश तहमा समेत त्यसको प्रभाव पर्न थालेको छ । आईतबार नेपाली कांग्रेस र नेकपा एमालेले सुदूरपश्चिमका मुख्यमन्त्री दीर्घबहादुर सोडारीलाई राजीनामा दिन आग्रह गरेका छन् ।
नेपाली कांग्रेस र नेकपा एमाले संसदीय दलले आइतबार संयुक्त प्रेस विज्ञप्ति जारी गर्दै अल्पमतमा परिसकेका कारण राजीनामा दिएर नयाँ सरकार गठनका लगि मार्गप्रशस्त गर्न माग गरेका हुन् ।
कांग्रेस संसदीय दलका नेता कमलबहादुर शाह र एमाले संसदीय दलका नेता राजेन्द्रसिंह रावलले कांग्रेस यसअघिदेखि नै विपक्षमा रहेको र एमालेले समेत समर्थन फिर्ता लिइसकेकाले वर्तमान सरकार अल्पमतमा परेकोले मुख्यमन्त्री सोडारीले नैतिक आधार गुमाइसकेको उल्लेख गरेका छन् ।
उनीहरुले नैतिक बहुमत गुमाइसकेको अल्पमतको सरकारले दैनिक कामकारवाही बाहेक अन्य कुनै कार्य सम्पादन नगर्न तथा नगराउन समेत आग्रह गरेका छन् ।
केन्द्रमा कांग्रेस र एमालेबीच केपी शर्मा ओलीलाई प्रधानमन्त्री बनाउने सहमति भएपछि २० असारमा सुदूरपश्चिममा एमालेले मुख्यमन्त्री सोडारीलाई दिएको समर्थन फिर्ता लिएको थियो ।
एमालेले समर्थन फिर्ता लिएसँगै अल्पमतमा परिसकेका सोडारीले प्रधानमन्त्री पुष्पकमल दाहाल प्रचण्डले विश्वासको मत लिँदासम्म पर्खिने बताएका छन् । सोडारी अल्पमतमा परेपछि प्रदेश सभामा विश्वासको मत परीक्षा गर्ने बताइरहेका छन् ।
- Reporter
