काठमाडौं । देशका हिमाली तथा पहाडी भू–भागमा आज आंशिक बदलीसँगै केही स्थानमा हल्का वर्षा हुने सम्भावना रहेको छ। तराईका अधिकांश क्षेत्रमा भने मौसम मुख्यतया सफा रहने मौसम पूर्वानुमान महाशाखाले जनाएको छ।

महाशाखाका अनुसार मंगलबार दिउँसो हिमाली तथा पहाडी भू–भागमा आंशिक बदली रहनेछ। ती क्षेत्रका एक–दुई स्थानमा हल्का वर्षा हुन सक्ने अनुमान गरिएको छ। तराईका अधिकांश स्थानमा भने घाम लाग्ने र मौसम सामान्यतया सफा रहने पूर्वानुमान छ।

रातिको समयमा कोशी, मधेश, बागमती र गण्डकी प्रदेशका सबै भू–भागमा आंशिक बदली रहने सम्भावना छ। कर्णाली र सुदूरपश्चिम प्रदेशका हिमाली क्षेत्रमा पनि बादल लाग्ने महाशाखाले जनाएको छ।

यस्तै, कर्णाली र सुदूरपश्चिम प्रदेशका पहाडी भू–भागमा मौसम मुख्यतया सफा रहनेछ। तराईका भू–भाग, उपत्यका तथा खोँचहरूमा बिहानपख केही स्थानमा हल्का हुस्सु तथा कुहिरो लाग्न सक्ने सम्भावना रहेको छ।

बिहानको समयमा हुस्सु र कुहिरो लाग्न सक्ने भएकाले विशेषगरी सडक तथा हवाई यातायातमा यात्रा गर्नेहरूले सतर्कता अपनाउनुपर्ने देखिन्छ। हिमाली तथा पहाडी क्षेत्रमा यात्रा गर्दा स्थानीय मौसमको अवस्थाबारे जानकारी लिएर यात्रा गर्नु उपयुक्त हुनेछ।

• Jigyasanepal