काठमाडौं । संक्रमणकालीन न्यायसँग सम्बन्धित विधेयकका विषयमा सहमति जुटाउन गठित कार्यदलको बैठक आज बस्दैछ। बेपत्ता पारिएका व्यक्तिको छानबिन, सत्य निरुपण तथा मेलमिलाप आयोग ऐनलाई संशोधन गर्न बनेको विधेयकमा रहेका विमतिका विषयलाई टुंग्याउन आज बैठक आयोजना गरिएको हो।
कार्यदलका सदस्य एवम् एमाले प्रमुख सचेतक महेश बर्तौलाले मुख्य दलबीच सहमति खोज्ने अन्तिम प्रयास भइरहेको जानकारी दिएका छन्। मानव अधिकारको गम्भीर उल्लंघन, हत्या परिभाषा, सशस्त्र द्वन्द्वका क्रममा जोडिएका र प्रभावित भएका व्यक्ति र महान्यायाधिवक्ताले गम्भीर मानव अधिकार उल्लंघनको विषयमा घटि माग दाबी लिएर जाने विषयमा सहमति नजिक पुगेको बताइएको छ। उनले चार विषयमा ७० प्रतिशत सहमति जुटेको र आज (बुधबार) बस्ने कार्यदलले टुङ्गो लगाउने बताएका छन्।
त्यस्तै, कार्यदलका सदस्य जनार्दन शर्माले आज बस्ने अन्तिम प्रतिवेदन तयार गरेर शीर्ष तहलाई बुझाउने बताएका छन्। यसअघि शीर्ष दलका नेता सम्मिलित तीन सदस्यीय कार्यदल गठन गरिएको थियो, जसमा बर्तौला, शर्मा र रमेश लेखक छन्।
- Jigyasa media
