काठमाडौं । संघीय संसद्को दुवै सदन— प्रतिनिधि सभा र राष्ट्रिय सभाको बैठक आज बस्दैछ। संसद् सचिवालयका अनुसार प्रतिनिधि सभाको बैठक दिउँसो १ बजे र राष्ट्रिय सभाको बैठक सवा १ बजे बस्नेछ।
आजको बैठकमा सरकारद्वारा प्रस्तुत अध्यादेशहरू स्वीकृत गर्ने वा अस्वीकार गर्ने प्रस्तावहरू छलफलमा रहनेछन्। साथै, अर्थ समिति, राज्यव्यवस्था तथा सुशासन समितिका प्रतिवेदनहरू पेस गरिने कार्यसूची रहेको संसद् महासचिव पद्मप्रसाद पाण्डेयले जानकारी दिएका छन्।
सरकारले दुवै सभाबाट अध्यादेश पारित गराएर प्रतिस्थापन विधेयक ल्याउने तयारी गरिरहेको छ। प्रतिनिधि सभामा बहुमत रहेको भए पनि राष्ट्रिय सभामा आवश्यक मत पुर्याउन सत्ता पक्षले अन्य दलहरूसँग छलफल गरिरहेको छ।
५९ सदस्यीय राष्ट्रिय सभामा अध्यादेश पारित गर्न ३० सांसदको समर्थन आवश्यक पर्छ। सत्ता गठबन्धनसँग कांग्रेस (१६), नेकपा एमाले (१०) र लोकतान्त्रिक समाजवादी पार्टी (१) सहित २७ सांसद रहेका छन्। मनोनीत सांसद डा. अञ्जान शाक्य र वामदेव गौतमको समर्थन रहन्छ भन्ने सत्तापक्षको विश्वास छ। जनमोर्चाले विरोध जनाइसकेको अवस्थामा जनता समाजवादी पार्टी नेपालसँग सहकार्यको प्रयास भइरहेको छ।
- Jigyasa media
