काठमाडौं – ललितपुरको कोन्जोसोम गाउँपालिका–३, दलचोकीमा बस्दै आएकी २१ वर्षीया प्रमिला भण्डारीले आफ्नै २३ महिनाकी छोरी प्रिन्सिका भण्डारीको हत्या गरेको आरोपमा पक्राउ परेकी छिन्। काभ्रे, पनौती निवासी प्रमिलाले एक महिनापछि छोरीको हत्या स्वीकार गरेकी हुन्।

२७ साउनमा प्रमिलाले छोरी हराएको भन्दै प्रहरीमा निवेदन दिएपछि खोजी कार्य अघि बढाइएको थियो। तर, २८ साउनमा सिलिङ्गेबेसी आँपबोटमा ठोस्ने खोलामा प्रिन्सिकाको शव पानीमा डुबेको अवस्थामा फेला परेको थियो। शवको पोष्टमार्टम रिपोर्टले शंकास्पद अवस्था देखाएपछि प्रहरीले अनुसन्धानलाई अघि बढाएको थियो।

प्रहरी अनुसन्धानका क्रममा प्रमिलाले छोरीको हत्या गरी शव खोलामा फालेको स्वीकार गरेकी छिन्। जिल्ला प्रहरी परिसर ललितपुरका एसपी नरेशराज सुवेदीका अनुसार प्रमिलाले छोरीलाई हिकाउँदा बेहोस भएपछि खोलामा फालेको बयान दिएको छ। 

ललितपुर जिल्ला अदालतबाट कर्तव्य ज्यानको कसुरमा ५ दिनको म्याद थपेर अनुसन्धान भइरहेको प्रहरीले जनाएको छ।

• Jigyasa media