काठमाडौँ, असोज १० । पछिल्लो १२ घण्टामा देशका चार प्रदेशका केही स्थानमा भारीदेखि धेरै भारी वर्षा भएको छ। मौसम पूर्वानुमान महाशाखाका अनुसार गण्डकी, लुम्बिनी, कर्णाली र सुदूरपश्चिम प्रदेशका केही स्थानमा भारीदेखि धेरै भारी वर्षा भएको हो।

महाशाखाका अनुसार गुल्मीको भार्से मौसम मापन केन्द्रमा पछिल्लो १२ घण्टामा ११४ मिलिमिटर वर्षा मापन भएको छ।

शनिबार बिहान साढे ६ बजे सार्वजनिक गरिएको विवरणअनुसार कोशी, मधेस र बागमती प्रदेशका धेरै स्थानमा भने हल्कादेखि मध्यम वर्षा भएको छ।

कति वर्षालाई हल्का, मध्यम र भारी भनिन्छ?

मौसमविद्का अनुसार २४ घण्टामा परेको वर्षाको मात्राका आधारमा वर्षालाई विभिन्न तहमा वर्गीकरण गरिन्छ।

१० मिलिमिटरभन्दा कम — हल्का वर्षा

१० देखि ५० मिलिमिटरभन्दा कम — मध्यम वर्षा

५० देखि १०० मिलिमिटरभन्दा कम — भारी वर्षा

१०० देखि २०० मिलिमिटरभन्दा कम — धेरै भारी वर्षा

२०० मिलिमिटरभन्दा बढी — अति भारी वर्षा

‘एक–दुई’, ‘केही’, ‘धेरै’ र ‘अधिकांश स्थान’ भनेको के हो?

मौसम पूर्वानुमानमा प्रयोग हुने यी शब्दले वर्षा हुने सम्भावित भूभागको प्रतिशत जनाउँछन्।

एक–दुई स्थान — १० प्रतिशतभन्दा कम भूभागमा वर्षा हुने सम्भावना

थोरै स्थान — १० देखि ३० प्रतिशत भूभाग

केही स्थान — ३० देखि ५० प्रतिशत भूभाग

धेरै स्थान — ५० देखि ८० प्रतिशत भूभाग

अधिकांश स्थान — ८० प्रतिशतभन्दा बढी भूभाग

यसरी मौसम महाशाखाले वर्षाको मात्रा र प्रभावित हुने सम्भावित भूभागको क्षेत्रफलका आधारमा पूर्वानुमानमा फरक–फरक शब्द प्रयोग गर्ने गर्दछ।

• Jigyasanepal