काठमाडौं, असोज ८ । बिहीबार देशका सबै प्रदेशका केही स्थानमा मौसम बदली रहने भएको छ। मौसम पूर्वानुमान महाशाखाका अनुसार विभिन्न प्रदेशका हिमाली, पहाडी तथा तराई भूभागमा मेघगर्जन र चट्याङसहित वर्षा तथा हिमाली क्षेत्रमा हिमपातको सम्भावना छ।

दिउँसो कोशी, बागमती, गण्डकी र लुम्बिनी प्रदेशका हिमाली तथा पहाडी भूभागका धेरै स्थान तथा कर्णाली र सुदूरपश्चिमका हिमाली तथा पहाडी क्षेत्रका थोरै स्थानमा मेघगर्जन/चट्याङसहित मध्यम वर्षा तथा हिमपात हुनसक्नेछ।

त्यस्तै, मधेश, कोशी, बागमती, गण्डकी र लुम्बिनीका तराई भूभाग तथा सुदूरपश्चिमका तराई क्षेत्रका केही स्थानमा समेत मेघगर्जन र चट्याङसहित मध्यम वर्षाको सम्भावना रहेको महाशाखाले जनाएको छ।

यी क्षेत्रमा भारी वर्षाको सम्भावना

महाशाखाका अनुसार कोशी, बागमती र गण्डकी प्रदेशका थोरै स्थान तथा मधेश र लुम्बिनी प्रदेशका एक–दुई स्थानमा भारी वर्षा हुनसक्नेछ।

त्यसैगरी कोशी र बागमती प्रदेशका पहाडी भूभागका एक–दुई स्थानमा धेरै भारी वर्षा हुनसक्ने पूर्वानुमान गरिएको छ।

वर्षासँगै मधेश प्रदेश तथा कोशी प्रदेशका तराई भूभागका थोरै स्थानमा हावाहुरी चल्नसक्ने सम्भावना पनि रहेको महाशाखाले जनाएको छ।

बंगालको खाडीको प्रणाली थप सक्रिय हुँदै

महाशाखाका अनुसार अहिले नेपालमा मनसुनी वायुसँगै पश्चिमी वायुको समेत आंशिक प्रभाव रहेको छ।

यसैबीच, बंगालको खाडीको न्यून चापीय क्षेत्र हाल पश्चिम–मध्य तथा आसपासको उत्तर–पश्चिमी बंगालको खाडीमा गहिरो न्यून चापीय क्षेत्रका रूपमा रहेको छ। उक्त प्रणाली आगामी दिनमा थप शक्तिशाली बन्दै पश्चिम–उत्तरपश्चिम दिशातर्फ सर्ने पूर्वानुमान गरिएको छ।

• Jigyasanepal