काठमाण्डौ ।
बागमती प्रदेशमा चालु आर्थिक वर्ष २०८१/८२ को साउनदेखि असोजसम्मको तीन महिनाको अवधिमा बाढी, पहिरो, डुबान, आगलागीजस्ता विपद्बाट १९१ जनाले ज्यान गुमाएका छन्। बागमती प्रदेश प्रहरी कार्यालय, मकवानपुर, हेटौँडाका अनुसार यस अवधिमा खासगरी असोज ११ र १२ गतेको भारी वर्षाका कारण उत्पन्न बाढी र पहिरोमा परी एक सय ७७ जनाको मृत्यु भएको छ।
प्रहरी उपरीक्षक दुर्गाराज रेग्मीका अनुसार, पहिरोमा परी १५७, बाढीमा बगेर ११, र डुबानमा ९ जनाको ज्यान गएको छ। थप आठ जनाको करेन्ट लागेर, चार जनाको चट्याङ लागेर, र आगलागी तथा जनावरको आक्रमणबाट एक-एक जनाको मृत्यु भएको पुष्टि भएको छ। त्यस्तै, विपद्का घटनामा परी १७३ जना घाइते भएका छन् भने ११ जना अझै बेपत्ता छन्। घाइतेहरूको विभिन्न अस्पतालमा उपचार भइरहेको र बेपत्ताहरूको खोजीकार्य जारी छ।
यस अवधिमा ९,७७८ पंक्षी र ५१६ चौपायाको मृत्यु भएको छ। साथै, १७१ पक्की र ६७३ कच्ची घर, ९३ सवारी साधन, २० उद्योग, ८३ विद्यालय, र १२ सरकारी कार्यालयमा समेत क्षति पुगेको प्रहरी कार्यालयले जनाएको छ। ४८ वटा पुल र सडकहरूमा समेत ठूलो क्षति हुँदा काठमाडौँसँगको सवारी आवागमन प्रभावित बनेको छ।
बाढी, पहिरो र डुबानका कारण कुल तीन अर्ब ४४ करोड ५३ लाख ६१ हजार ९६० रुपैयाँ बराबरको भौतिक धनमालको क्षति भएको प्रहरी कार्यालयले जानकारी दिएको छ।
- Jigyasa media
