नुवाकोट ।
नुवाकोटमा काठमाडौँतर्फ आउँदै गरेको जिप दुर्घटना हुँदा एक जनाको मृत्यु भएको छ भने दुई जना गम्भीर घाइते भएका छन्।
बिहीबार साँझ छहरे–टोखा सडकखण्डअन्तर्गत शिवपुरी गाउँपालिका–६ गुर्जेभञ्ज्याङमा बिएई ०५६९ नम्बरको विद्युतीय जिप अनियन्त्रित भई सडकबाट करिब १५० मिटर तल भिरमा खसेको जिल्ला ट्राफिक प्रहरी कार्यालय नुवाकोटले जनाएको छ।
दुर्घटनामा सिराहा सुखीपुर नगरपालिका–२ का ३५ वर्षीय सञ्जीवकुमार चौधरीको मृत्यु भएको प्रहरीले जनाएको छ। गम्भीर घाइते भएका उनलाई तत्काल उद्धार गरी उपचारका लागि काठमाडौँस्थित ग्राण्डी अस्पताल पुर्याइए पनि चिकित्सकले मृत घोषणा गरेका थिए। प्रहरीका अनुसार सवारी चालक अनुमति पत्रका आधारमा उनको सनाखत गरिएको हो।
दुर्घटनामा सुनसरी इनरुवा नगरपालिका–५ का ४० वर्षीय उत्सव पोखरेल र काठमाडौँ महानगरपालिका–९ गौरीघाटका ४४ वर्षीय लोकेश मिश्र घाइते भएका छन्। दुवै जनाको ग्राण्डी अस्पतालमा उपचार भइरहेको छ।
जिल्ला ट्राफिक प्रहरी कार्यालय नुवाकोटका प्रमुख प्रहरी निरीक्षक विनोद ढकालका अनुसार जिप गुडिरहेको अवस्थामा अचानक अनियन्त्रित भएर भिरमा खसेको थियो। दुर्घटनापछि स्थानीयवासी र प्रहरीको टोलीले अँध्यारो तथा जङ्गल क्षेत्रको कठिन अवस्थाबीच तत्काल उद्धार कार्य सञ्चालन गरेको थियो।
घटनाबारे थप अनुसन्धान भइरहेको प्रहरीले जनाएको छ।
-
Jigyasanepal
