हेटौँडा, चैत १८ — मकवानपुरमा चट्याङ लागेर एक जनाको ज्यान गएको छ भने अर्का एक जना घाइते भएका छन्। मंगलबार साँझ करिब ६:३० बजे हुरीसहित परेको वर्षाका क्रममा परेको चट्याङले बागमती गाउँपालिका–१ भैसेस्थित बागमती खोलाको बगरमा रहेका दुई जनालाई एकैसाथ प्रहार गरेको थियो।
जिल्ला प्रहरी कार्यालय मकवानपुरका अनुसार गम्भीर घाइते भएका ३२ वर्षीय अजय पहरीको उपचारका क्रममा हेटौँडास्थित अस्पतालमा राति करिब ११:२५ बजे मृत्यु भएको हो। अर्का ३७ वर्षीय उज्वल थोकर भने हाल हेटौँडामै उपचाररत रहेका छन् र उनको अवस्था मध्यम रहेको जनाइएको छ।
प्रहरी प्रवक्ता डीएसपी पुष्कर बोगटीका अनुसार दुवै जना माछा मारेर घर फर्किने क्रममा अचानक परेको चट्याङको चपेटामा परेका थिए। घटनालगत्तै स्थानीयले उद्धार गरी पहरीलाई प्रारम्भिक उपचारका लागि झुरझुरेस्थित सान्भि पोलिक्लिनिक पुर्याएका थिए। त्यहाँबाट थप उपचारका लागि हेटौँडा रिफर गरिए पनि उनको ज्यान जोगाउन सकिएन।
चेतावनी: मौसमसँग लापरबाही घातक
हाल देशका विभिन्न स्थानमा हुरी, वर्षा र चट्याङको जोखिम बढिरहेको छ। यस्तो अवस्थामा खुला स्थान, खोला किनार वा अग्ला ठाउँमा बस्नु जोखिमपूर्ण हुने भएकाले सतर्क रहन विज्ञहरूले आग्रह गरेका छन्।
चट्याङजस्ता प्राकृतिक विपद्ले क्षणभरमै ज्यान लिने जोखिम हुने भएकाले मौसम पूर्वानुमानलाई ध्यान दिँदै सुरक्षित स्थानमा बस्न स्थानीय प्रशासनले समेत सर्वसाधारणलाई सचेत गराएको छ।
-
Jigyasanepal
