काठमाडौं – त्रिभुवन विश्वविद्यालय (टियु)ले स्वतन्त्र विद्यार्थी युनियन (स्ववियु) निर्वाचनको कार्यतालिका सार्वजनिक गरेको छ। निर्धारित कार्यतालिका अनुसार चैत ५ गते निर्वाचन सम्पन्न गरिनेछ।
निर्वाचन प्रक्रिया फागुन १९ गतेबाट सुरु हुने टियुले जनाएको छ। सोही दिन संघ/संगठन दर्ता गरिनेछ भने फागुन २१ गते मतदाता सूची प्रकाशन गरिनेछ। फागुन २५ गतेभित्र मतदाता सूची सम्बन्धी दाबी–विरोध पेश गर्न सकिनेछ, जसपछि सोही दिन बेलुका ५ बजे अन्तिम नामावली सार्वजनिक गरिनेछ।
फागुन २६ गते ११ बजेबाट २ बजेसम्म मनोनयन पत्र वितरण गरिनेछ भने फागुन २७ गते सोही समय अवधिमा उम्मेदवारी दर्ता गर्न सकिनेछ। सोही दिन बेलुका ५ बजे उम्मेदवारको प्रारम्भिक नामावली प्रकाशन हुनेछ। फागुन २८ गते उम्मेदवारीमाथि दाबी–विरोध तथा छानबिन गरी अन्तिम सूची सार्वजनिक गरिनेछ।
फागुन २९ गते उम्मेदवारी फिर्ता लिन सकिनेछ र सोही दिन अन्तिम उम्मेदवार नामावली प्रकाशन गरिनेछ।
चैत ५ गते बिहान ८ बजेदेखि दिउँसो ४ बजेसम्म मतदान प्रक्रिया सञ्चालन गरिनेछ। प्रचार–प्रसारका लागि फागुन २९ देखि चैत २ गते मध्यरातसम्म समय छुट्याइएको छ।
- Jigyasa media
