काठमाडौँ, कात्तिक ११ – गैरआवासीय नेपाली सङ्घ (एनआरएनए)को ‘ग्लोबल’ सम्मेलन आज काठमाडौंमा सुरु हुँदैछ। "रूपान्तरण र एकताः श्रम, लगानी र नागरिकताको निरन्तरता" भन्ने नारासहित आयोजना गरिएको सम्मेलनको उद्घाटन बिहान ९:३० बजे प्रधानमन्त्री केपी शर्मा ओलीले गर्ने कार्यक्रम छ।

कार्यक्रममा नेपाल सरकारका मन्त्रीहरू, उच्च पदस्थ पदाधिकारीहरू, र विश्वभरबाट आएका पाँच सयभन्दा बढी प्रतिनिधिको सहभागिता रहनेछ। विभिन्न देशबाट आएका एनआरएन प्रतिनिधिहरू साधारणसभामा भाग लिन काठमाडौं आइपुगेका छन्, र सम्मेलनको सम्पूर्ण तयारी पूरा भएको एनआरएनएले जनाएको छ।

सम्मेलनको पहिलो दिन आर्थिक रूपान्तरणका लागि पूर्वाधार विकास, गैरआवासीय नेपाली नागरिकता, मताधिकार, गोर्खा र विदेशी नागरिकका हकहरू, जलवायु परिवर्तनले महिला र बालबालिकामा पार्ने असर, तथा समृद्ध नेपालका लागि विज्ञान र प्रविधि हस्तान्तरण सम्बन्धी विषयमा छलफल हुनेछ।

दोस्रो दिन प्रवासी युवाको सशक्तीकरण, वैदेशिक रोजगारीको सुरक्षा, सामाजिक सुरक्षा, तथा नेपाल पर्यटन प्रवर्द्धन नीति लगायतका विषयहरूमा सत्रहरू राखिनेछन्। यस ‘ग्लोबल’ सम्मेलनले सरकार, गैरआवासीय नेपाली समुदाय, र अन्य सरोकारवालाबीच सहकार्यको वातावरण निर्माण गर्ने विश्वास लिइएको छ।

कात्तिक १२ मा एनआरएनए विधान अनुसार नियमित वार्षिक साधारण सभा पनि आयोजना गरिनेछ, जसमा ६० भन्दा बढी देशका प्रतिनिधिहरू भर्चुअल र प्रत्यक्ष रूपमा सहभागी हुनेछन्। साधारणसभामा आर्थिक तथा वार्षिक प्रतिवेदन माथि छलफल गरी पारित गर्ने तयारी छ। एनआरएनएले यस वार्षिक साधारणसभालाई एकताको थलो बनाउने उद्देश्यसहित विगतका असमझदारीलाई छलफलबाट समाधान गर्ने आह्वानगरेको छ।

• Jigyasa media