काठमाण्डौ ।
काठमाडौंबाट सिन्धुली जाँदै गरेको बस मंगलबार दिउँसो रामेछापको भिरपानीमा दुर्घटना भएको छ। जिल्ला प्रहरी कार्यालय रामेछापका अनुसार बसमा सवार ११ देखि १२ जना यात्रु घाइते भएका छन्, जसमध्ये २ जनाको अवस्था गम्भीर छ। घाइते यात्रुहरुलाई उपचारका लागि मुलकोट लगिएको छ।
स्थानीयले दिएको जानकारी अनुसार बसको ब्रेक फेल भएपछि केही यात्रु आफैं हाम फालेका थिए। दुर्घटनाको थप विवरण आउन बाँकी छ।
बाढी-पहिरोका कारण बीपी राजमार्ग अवरुद्ध भएपछि अहिले काठमाडौं-चरिकोट-मन्थली-सिन्धुलीको वैकल्पिक मार्ग सञ्चालन भइरहेको छ।
यसअघि आज बिहान पनि काठमाडौंबाट सिन्धुलीको फिक्कलतर्फ जाँदै गरेको टाटा सुमो रामेछापको मन्थलीमा दुर्घटनामा परेको थियो। मन्थली नगरपालिका–७ भटौली पुलमाथि भएको दुर्घटनामा चालक घाइते भएका छन् भने सुमोमा ११ जना यात्रु सवार थिए।
- Jigyasa media
