काठमाडौं, कात्तिक २ — काठमाडौं महानगरपालिकाले टेकुस्थित बुद्धमाई अस्पताललाई फोहर व्यवस्थापनमा लापरवाही गरेको भन्दै एक लाख रुपैयाँ जरिवाना गरेको छ। महानगरपालिकाले अस्पताललाई पटक-पटक सुधारको आग्रह गरे पनि अटेरी भएपछि चौथोपटकको अनुगमनमा यो जरिवाना गरेको हो।
अस्पतालमा पहिलो अनुगमन २०७९ फागुन ११ मा भएको थियो, जहाँ नर्सिङ स्टेशनमा मेडिसिन ट्रली नभएको र फोहर व्यवस्थापनका लागि आवश्यक रङ सङ्केतसहितका बाल्टिनहरू नदेखिएको थियो। त्यसपछि, सुधारका लागि अनुरोध गरिएको भए पनि अस्पतालले बेवास्ता गरेको पाइएको थियो।
तेस्रोपटक भदौ २२ मा अनुगमन गर्दा पनि फोहर व्यवस्थापनमा लापरवाही देखियो, जसमा सबै प्रकारका फोहर एकै ठाउँमा जम्मा गरिएको थियो। यसपछि, अनुगमन टोलीले सुधारको लागि अन्तिम मौका दिएको थियो। तर, अन्तिम अनुगमनमा पनि स्थिति उस्तै रहेपछि काठमाडौं महानगरपालिकाले एक लाख जरिवाना गरेको हो। यसअघि पनि, अस्पताललाई १५ हजार जरिवाना गरिएकोथियो।
- Jigyasa media
