काठमाडौं— पाकिस्तानको बलुचिस्तानमा पछिल्लो २४ घण्टामा कम्तीमा २३ जनाको हत्या भएको छ। पञ्जाब र बलुचिस्तानलाई जोड्ने राजमार्गमा मुसाखेल जिल्लाको रारशाम इलाकामा बन्धुकधारी समूहले बस, भ्यान, र ट्रकमा रहेका मानिसहरूलाई ओरालेर गोली हानेका हुन्।
जिल्लाका सहायक आयुक्त नजीब कक्कडका अनुसार ३०/४० जनाको समूहले २२ वटा गाडी रोकेर पञ्जाबबाट आएका यात्रुहरूको पहिचानपछि गोली चलाएको थियो। यस आक्रमणमा २३ सवारी साधनमा आगजनी पनि गरिएको छ।
घटनास्थलमा प्रहरी टोली पुगेको र हत्या गरिएका व्यक्तिहरूको शव संकलन गरी अस्पतालमा पठाउने काम भइरहेको छ।
यस आक्रमणको जिम्मा चरमपन्थी समूह बलुच लिबरेशन आर्मी (बीएलए) ले लिएको छ। घटनापछि भएको जवाफी कारबाहीमा १२ जना चरमपन्थीको मृत्यु भएको पाकिस्तानी अधिकारीहरूले बताएका छन्।
यसैगरी पछिल्लो २४ घण्टामा प्रहरी चौकी, सुरक्षा बलको शिविर, र सरकारी कार्यालयहरूमा पनि आक्रमण भएका छन्।
- Jigyasa media
