काठमाण्डौ ।
दशैंको चहलपहल र हर्षोल्लासबीच, यो वर्षको दशैंलाई सुरक्षित बनाउन नेपाल प्रहरीले देशभर ६० हजार प्रहरी परिचालन गरेको छ। प्रहरी प्रधान कार्यालयले चाडपर्वको सुरक्षाका लागि विशेष योजना बनाएर ७७ जिल्लामा प्रहरी जनशक्ति परिचालन गरेको जानकारी दिएको छ।
देशभर ७९ हजार भन्दा बढी प्रहरी दरबन्दी रहेकोमा यसपालि करिब ४ हजार रिक्त रहेका छन्। यद्यपि, प्रहरीको प्राथमिकता भने दशैंको सुरक्षा व्यवस्था चुस्त राख्नमा रहेको छ। नेपाल प्रहरीका केन्द्रीय प्रवक्ता डीआईजी दानबहादुर कार्कीका अनुसार, सुरक्षा योजना अन्तर्गत चाडपर्वको समयमा अधिकांश प्रहरीलाई बिदा नदिइ, उनीहरुलाई सुरक्षा कार्यमा खटाइएको छ।
विशेष सुरक्षा व्यवस्था
काठमाडौँ उपत्यकामा मात्र १० हजार प्रहरी परिचालन गरिएको छ। तीन जिल्ला–काठमाडौँ, ललितपुर, र भक्तपुरमा जनशक्ति थप गरि, चोरी, डकैती, तथा अन्य अपराधहरूको नियन्त्रणका लागि व्यापक गस्तीको व्यवस्था मिलाइएको छ। एसपी नवराज अधिकारीका अनुसार, १४ वटा एरियामा डीएसपीको कमाण्डमा टोली खटाइएको छ भने दुई रुटमा लामो दूरीका गस्ती र ४२ रुटमा छोटो दूरीका गस्ती गरिएका छन्।
यसबाहेक, सादा पोशाकमा सूचना संकलन गर्न ३८ वटा टोली परिचालन गरिएको छ। साथै, २२ ठाउँमा एम्बुसिङ चेकिङ र हरेक दिन नाकामा प्रशिक्षित कुकुरहरू परिचालन गरिएको छ।
दशैंमा हुने सम्भावित अपराधहरू
प्रहरीले दशैंका बेला चोरी, डकैती, कुटपिट, जुवातास, मदिरा सेवन जस्ता अपराधहरू बढ्न सक्ने चेतावनी दिएको छ। खासगरी, शहरी इलाकामा चोरी, लुटपाट, कुटपिट, र अवैध व्यापारको जोखिम रहेको प्रहरीको भनाइ छ।
सवारी दुर्घटना, मदिरा सेवनपछि हुने झगडा, र ट्राफिक नियम उल्लंघनहरू पनि प्रहरीको विशेष निगरानीमा छन्। दशैंको समयमा पनि जनतालाई सुरक्षित र शान्त वातावरण उपलब्ध गराउन, देशभर व्यापक प्रहरी परिचालन गरिएको छ।
- Jigyasa media
