अर्घाखाँची— शितगंगा नगरपालिकामा भएको बस दुर्घटनामा २४ जना घाइते भएका छन्। दुर्घटना शितगंगा नगरपालिका-४ को कोप्चेवासमा नरपानीबाट गोरुसिंगेतर्फ जाँदै गरेको भे १ ख २११८ नम्बरको बस र लु ३० प २५४४ नम्बरको मोटरसाइकल एकआपसमा ठक्कर खाँदा भएको हो।

बसले मोटरसाइकललाई ठक्कर दिएपछि अनियन्त्रित भई सडकबाट करिब १० मिटर तल खस्दा बस र मोटरसाइकलमा रहेका यात्रुहरू घाइते भएका छन्। जिल्ला प्रहरी कार्यालय अर्घाखाँचीका प्रहरी निरीक्षक विष्णु पौडेलका अनुसार, घाइतेमध्ये ४ जनाको अवस्था गम्भीर छ।

गम्भीर घाइतेलाई प्राथमिक स्वास्थ्य केन्द्र ठाडामा प्राथमिक उपचारपछि लुम्बिनी प्रादेशिक अस्पतालमा रिफर गरिएको छ। अन्य २० जना घाइतेहरूको ठाडामै उपचार भइरहेको छ। अधिकांश घाइते बाँके जिल्लाका हुन्।

बस चालकलाई प्रहरीले नियन्त्रणमा लिई घटनाको थप अनुसन्धान अघि बढाएको जिल्ला प्रहरी कार्यालयका प्रमुख डीएसपी चक्रबहादुर मल्लले जानकारी दिएका छन्।

यस दुर्घटनाले पुनः सडक सुरक्षाको महत्वलाई उजागर गरेको छ। यात्रुहरूको जीवन रक्षाका लागि ट्राफिक नियम पालनाको कडा आवश्यकता देखिएको छ। थप विवरण प्राप्त भएमा अपडेट गरिनेछ।

यात्रा गर्दा सवारी चालकले नियमअनुसार गति नियन्त्रणमा राख्नुपर्ने र यात्रुहरूले सुरक्षित यात्रा सुनिश्चित गर्न ट्राफिक नियमको पालना गर्नुपर्ने ट्राफिक प्रहरीले आग्रह गरेको छ।

• Jigyasa media