असोज ५, काठमाडौं । देशका अधिकांश भूभागमा सोमबार मौसम बदली रहने भएको छ। जल तथा मौसम विज्ञान विभागका अनुसार केही स्थानमा मेघगर्जन र चट्याङसहित वर्षा हुनुका साथै हिमाली क्षेत्रमा हिमपातको सम्भावना छ।

दिउँसो हिमाली तथा पहाडी भूभाग, मधेश प्रदेश र बागमती तथा गण्डकीका तराई क्षेत्रमा सामान्यतया बदली रहनेछ। त्यस्तै, कोशी, लुम्बिनी र सुदूरपश्चिमका तराई क्षेत्रमा आंशिक बदली रहने पूर्वानुमान गरिएको छ।

चार प्रदेशका पहाडी क्षेत्रमा भारी वर्षाको सम्भावना

महाशाखाका अनुसार कोशी, बागमती र गण्डकीका हिमाली तथा पहाडी भूभागका केही स्थान तथा लुम्बिनी, कर्णाली र सुदूरपश्चिमका हिमाली तथा पहाडी क्षेत्रका थोरै स्थानमा मेघगर्जन/चट्याङसहित मध्यम वर्षा वा हिमपात हुनसक्नेछ।

यस्तै, कोशी, बागमती, गण्डकी र लुम्बिनी प्रदेशका पहाडी भूभागका एक–दुई स्थानमा भारी वर्षा समेत हुनसक्ने पूर्वानुमान छ।

तराई क्षेत्रमा पनि वर्षाको सम्भावना कायमै छ। मधेश तथा कोशी र बागमतीका तराई भूभागका थोरै स्थान तथा गण्डकी, लुम्बिनी र सुदूरपश्चिमका तराई भूभागका एक–दुई स्थानमा मेघगर्जन/चट्याङसहित मध्यम वर्षा हुनसक्ने विभागले जनाएको छ।

राति पनि वर्षाको सम्भावना

राति कोशी, बागमती, गण्डकी र कर्णालीका हिमाली तथा पहाडी भूभागमा सामान्यतया बदली रहनेछ। लुम्बिनी र सुदूरपश्चिमका हिमाली तथा पहाडी क्षेत्रसहित देशका अधिकांश तराई भूभागमा भने आंशिक बदली रहने अनुमान छ।

रातिको समयमा पनि कोशी, बागमती र गण्डकीका हिमाली तथा पहाडी भूभागका थोरै स्थान तथा लुम्बिनी, कर्णाली र सुदूरपश्चिमका हिमाली तथा पहाडी भूभागका एक–दुई स्थानमा मेघगर्जन/चट्याङसहित मध्यम वर्षा हुनसक्नेछ।

त्यसैगरी मधेश तथा कोशी र बागमतीका तराई भूभागका एक–दुई स्थानमा पनि मेघगर्जन र चट्याङसहित मध्यम वर्षाको सम्भावना रहेको मौसम पूर्वानुमान महाशाखाले जनाएको छ।

• Jigyasanepal