कात्तिक १३ र १४ गते धेरै प्रदेशमा मध्यमदेखि भारी वर्षाको सम्भावना, उच्च पहाडी तथा हिमाली क्षेत्रमा हिमआँधी र हिमपहिरोको खतरा

जिज्ञासा नेपाल | समाचार

काठमाडौं । बंगालको खाडीमा विकसित चक्रवात ‘अरनब’को प्रभावले नेपालका विभिन्न क्षेत्रमा वर्षा, चट्याङ र हावाहुरी हुन सक्ने पूर्वानुमानपछि राष्ट्रिय विपद् जोखिम न्यूनीकरण तथा व्यवस्थापन प्राधिकरणले सर्वसाधारणलाई उच्च सतर्कता अपनाउन आग्रह गरेको छ।

प्राधिकरणका अनुसार कात्तिक १२ गते बिहीबार रातिदेखि मौसम प्रभावित हुन सक्ने र कात्तिक १३ गते शुक्रबार तथा १४ गते शनिबार वर्षाको जोखिम बढी रहने सम्भावना छ। जल तथा मौसम विज्ञान विभागको विशेष मौसम बुलेटिनलाई आधार मानेर प्राधिकरणले सम्भावित विपद्बाट जोगिन पूर्वतयारी गर्न अनुरोध गरेको हो।

पाँच प्रदेशमा वर्षाको सम्भावना

चक्रवातको प्रभावका कारण कोशी, मधेश, बागमती, गण्डकी र लुम्बिनी प्रदेशका धेरै स्थानमा मेघगर्जन, चट्याङ र हावाहुरीसहित मध्यम वर्षा हुन सक्ने अनुमान छ। केही स्थानमा भने भारी वर्षा हुन सक्ने भएकाले बाढी, डुबान र पहिरोको जोखिमप्रति सचेत रहनुपर्ने देखिएको छ।

कर्णाली र सुदूरपश्चिम प्रदेशका केही स्थानमा पनि मेघगर्जन र हावाहुरीसहित वर्षा हुन सक्ने तथा एक–दुई स्थानमा भारी वर्षाको सम्भावना रहेको प्राधिकरणले जनाएको छ।

हिमाली क्षेत्रमा हिमपहिरोको जोखिम

वर्षासँगै उच्च पहाडी तथा हिमाली क्षेत्रमा भारी हिमपात, हिमआँधी र हिमपहिरोको जोखिमसमेत औँल्याइएको छ। प्रतिकूल मौसमले पदयात्रा, पर्वतारोहण, सडक तथा हवाई यातायात प्रभावित पार्न सक्ने भएकाले जोखिमयुक्त क्षेत्रमा अनावश्यक यात्रा नगर्न आग्रह गरिएको छ।

विशेषगरी उच्च हिमाली भेगमा जाने पर्यटक, पदयात्री, पर्वतारोही, गाइड तथा सहयोगी कर्मचारीले मौसमको पछिल्लो अवस्था बुझेर मात्रै यात्रा तय गर्नुपर्ने देखिन्छ। ट्रेकिङ एजेन्सीहरूलाई पनि पर्यटक र कर्मचारीको सुरक्षाका लागि आवश्यक तयारी गर्न सचेत गराइएको छ।

धानबाली सुरक्षित राख्न पनि आग्रह

सम्भावित वर्षाले खेतमा रहेको धान काट्ने तथा काटिसकेको बाली सुकाउने र भित्र्याउने काममा असर पार्न सक्छ। त्यसैले किसानलाई सम्भव भएसम्म मौसम प्रतिकूल हुनुअघि धानबाली काटेर सुरक्षित स्थानमा भण्डारण गर्न र मौसम पूर्वानुमानअनुसार कृषि कार्य व्यवस्थापन गर्न आग्रह गरिएको छ।

के–के सावधानी अपनाउने?

प्राधिकरणले नदी तथा खोलाको किनार, बाढी आउन सक्ने क्षेत्र र पहिरोको जोखिम भएका स्थानमा नबस्न, अत्यावश्यक कामबाहेक यात्रा नगर्न तथा मौसमसम्बन्धी आधिकारिक सूचना नियमित रूपमा हेर्न अनुरोध गरेको छ। जोखिमको संकेत देखिएमा ढिलाइ नगरी सुरक्षित स्थानमा जान पनि आग्रह गरिएको छ।

मौसमको अवस्था र वर्षाको तीव्रता स्थानअनुसार फरक पर्न सक्ने भएकाले पूर्वानुमानलाई निश्चित घटनाका रूपमा नलिई विभाग तथा सम्बन्धित निकायका अद्यावधिक सूचना पालना गर्नुपर्नेछ।

आपत्कालीन सम्पर्क नम्बर

• मौसमसम्बन्धी जानकारी: ११५५
• विपद् सहायता: १२३४
• नेपाल प्रहरी: १००
• पर्यटक प्रहरी: ११४४

सम्भावित जोखिमलाई ध्यानमा राख्दै सर्वसाधारण, किसान, यात्रु र पर्यटन व्यवसायीलाई पूर्वतयारीमा जुट्न तथा आधिकारिक चेतावनीलाई गम्भीरतापूर्वक लिन प्राधिकरणले आग्रह गरेको छ।

• Jigyasanepal