पहिलो खेल दिउँसो साढे १२ बजे, दोस्रो खेल साँझ ५ बजे
काठमाडौं । नेपाल प्रिमियर लिग (एनपीएल) को तेस्रो संस्करणअन्तर्गत आज मंगलबार दुई खेल हुँदैछन्। त्रिभुवन विश्वविद्यालय क्रिकेट मैदानमा हुने खेलमा विराटनगर किंग्सले चितवन राइनोजसँग प्रतिस्पर्धा गर्दा दोस्रो खेलमा कर्णाली याक्स र जनकपुर बोल्ट्स आमनेसामने हुनेछन्।
आजको पहिलो खेल विराटनगर किंग्स र चितवन राइनोजबीच दिउँसो १२ः३० बजे सुरु हुनेछ। दुवै टोली प्रतियोगितामा आफ्नो प्रदर्शन बलियो बनाउने लक्ष्यसहित मैदानमा उत्रनेछन्।
त्यसैगरी, आजको दोस्रो खेलमा कर्णाली याक्स र जनकपुर बोल्ट्सबीच प्रतिस्पर्धा हुनेछ। यी दुई टोलीबीचको खेल साँझ ५ बजे सुरु हुने तालिका छ।
एनपीएलको उद्घाटन खेलमा सोमबार साविक विजेता लुम्बिनी लायन्सले सुदूरपश्चिम रोयल्सलाई ७ विकेटले पराजित गर्दै प्रतियोगितामा विजयी सुरुआत गरेको थियो।
कात्तिक ९ गतेदेखि सुरु भएको प्रतियोगिता मंसिर ५ गतेसम्म सञ्चालन हुनेछ। प्रतियोगितामा आठ टोली सहभागी छन्।
आजका दुवै खेलको प्रत्यक्ष प्रसारण हिमालय स्पोर्ट्समार्फत हुनेछ। दर्शकले खेलको प्रत्यक्ष अपडेट र विवरणसमेत विभिन्न सञ्चारमाध्यमबाट प्राप्त गर्न सक्नेछन्।
-
Jigyasanepal
