काठमाडौं । पोर्चुगिज फुटबल स्टार क्रिस्टियानो रोनाल्डोले लामो समयदेखिकी प्रेमिका जर्जिना रोड्रिग्वेजसँग विवाह गरेका छन्।
सन् २०१६ मा स्पेनको म्याड्रिडमा पहिलो भेट भएपछि प्रेम सम्बन्धमा रहेका रोनाल्डो र जर्जिनाले सामाजिक सञ्जालमार्फत विवाहको खबर सार्वजनिक गरेका हुन्। उनीहरूले विवाहको औँठी देखाउँदै खिचिएको तस्बिरसमेत सार्वजनिक गरेका छन्।
४१ वर्षीय रोनाल्डोले आफ्नो क्लब अल नासरले २०२६–२७ सिजनको साउदी प्रो लिग अभियान सुरु गर्नुभन्दा चार दिनअघि विवाह गरेका हुन्।
विवाह समारोह पोर्चुगलको राजधानी लिस्बनबाट करिब २० माइल पश्चिममा रहेको समुद्री तटीय सहर कास्काइसमा भएको जनाइएको छ। विशेष समारोहमा रोनाल्डो र जर्जिनाका पाँचै सन्तान सहभागी भएका थिए।
रोनाल्डो र जर्जिना लामो समयदेखि सँगै रहँदै आएका थिए। विवाहसँगै उनीहरूको सम्बन्धले औपचारिक रूप पाएको छ।
फुटबल करियरमा रोनाल्डोले स्पोर्टिङ, म्यानचेस्टर युनाइटेड, रियल मड्रिड, युभेन्टस, अल नासर तथा पोर्चुगल राष्ट्रिय टोलीबाट खेलिसकेका छन्। उनको नाम विश्व फुटबलका सर्वाधिक सफल गोलकर्तामध्ये अग्रस्थानमा पर्छ र करियरमा उनले झण्डै १,००० गोल पूरा गरिसकेका छन्।
-
Jigyasanepal
