काठमाडौं: राष्ट्रपति रामचन्द्र पौडेलले आज भाइटीकाको अवसरमा आफ्ना बहिनीहरू शारदा पण्डित र चन्दा ओझाबाट विधिपूर्वक टीका ग्रहण गरेका छन्। बिहान ११:३७ बजेको शुभ साइतमा राष्ट्रपति भवनमा आयोजित विशेष कार्यक्रममा पौडेलले बहिनीहरूको हातबाट टीका लगाए।
टीका लगाइँदा राष्ट्रपतिलाई ओखर, बदामसहितका परम्परागत सौगात प्रदान गरिएको थियो। टीका ग्रहणपछि राष्ट्रपति पौडेलले बहिनीहरूलाई आत्मीयतासाथ टीका लगाइदिएर दक्षिणा दिए। नेपाल पञ्चाङ्ग निर्णायक समितिले आज भाइटीकाको उत्तम साइत ११:३७ बजे निर्धारण गरेको थियो, यद्यपि दिनभर टीका लगाउन सकिने उल्लेख गरिएको छ।
यमपञ्चकको अन्तिम दिन दिदीबहिनी र दाजुभाइले एकअर्कालाई टीका लगाएर स्नेह साटासाट गर्ने परम्पराले दिदीबहिनी र दाजुभाइबीचको सम्बन्धलाई अझ प्रगाढ बनाउने विश्वास गरिन्छ।
- RSS
