खानीखोला, फागुन २७ – नेपाल कम्युनिस्ट पार्टी (एमाले) खानीखोला गाउँपालिका-६ नं. वडा कमिटीद्वारा वनभोज तथा युवा संघ नेपाल, किसान महासंघ, र लोकतान्त्रिक आदिवासी जनजाति महासंघ सम्मेलन कार्यक्रम भव्य रूपमा सम्पन्न भएको छ।

खानीखोला गाउँपालिका थुम्कीटावर, खानीखोला-६ मा सम्पन्न उक्त कार्यक्रममा पूर्व कानुनमन्त्री नेकपा एमाले स्थायी कमिटी सदस्य शेर बहादुर तामाङ, बागमती प्रदेशका पूर्व कृषिमन्त्री चन्द्र लामा, खानीखोला गाउँपालिकाका पूर्व अध्यक्ष कृष्ण बहादुर खुलाल, एमाले बागमती प्रदेश कमिटी सदस्य शेखर लामा, गाउँपालिका कमिटीका पदाधिकारीहरू, पूर्व जनप्रतिनिधि विभिन्न पालिकाका जनप्रतिनिधिहरू तथा नेता-कार्यकर्ताहरूको उत्साहजनक उपस्थिति रहेको थियो।

एमाले संगठन सुदृढीकरण, पार्टीलाई स्थानीयस्तरमा अझ प्रभावकारी बनाउने योजना

युवा, कृषि, र समावेशिता – युवाहरूको राजनीतिक सहभागिता, कृषिमा आधुनिकीकरण, र आदिवासी जनजाति तथा किसानहरूको हकहित प्रवर्द्धनमा विशेष छलफल गर्दै भेलाले भविष्यका रणनीति – एमालेकै नेतृत्वमा समृद्ध नेपाल निर्माण गर्ने लक्ष्यमा स्थानीय तहको भूमिका का सवालमा धारणा बनाएको थियो ।

कार्यक्रममा नेताहरूको प्रतिबद्धता उक्त अवसरमा सम्बोधन गर्दै नेताहरूले एमालेको दृढ संगठनात्मक संरचना, जनताको अपार विश्वास, र देशको समृद्धिको लागि पार्टीको नीतिगत मार्गचित्रबारे चर्चा गरे।

पूर्व कानुनमन्त्री शेर बहादुर तामाङले न्यायिक सुधार, कानुनी सशक्तीकरण, र स्थानीय तहमा नीति निर्माणमा एमालेको भूमिकाबारे जोड दिए। पूर्व कृषिमन्त्री चन्द्र लामाले कृषिमा आधुनिकीकरण र उत्पादन वृद्धिको लागि एमाले सरकारले लिने रणनीतिबारे प्रकाश पार्दै युवा शक्ति लाई स्वदेशमा रोजगारी दिने सवालमा तीनै तहको सरकार गम्भीर भएर लाग्नु पर्ने बताए । गाउँपालिकाका पूर्व अध्यक्ष कृष्ण बहादुर खुलालले एमालेकै नेतृत्वमा स्थानीय विकास सम्भव हुने भन्दै जनतासँगको सम्बन्ध अझै सुदृढ बनाउने प्रतिबद्धता व्यक्त गरे। एमाले प्रदेश कमिटी सदस्य शेखर लामाले पार्टीका रणनीतिक योजना र संगठन सुदृढीकरणबारे धारणा राखेका थिए ।

संगठन सशक्तीकरणतर्फ महत्वपूर्ण कदम भेला तथा सम्मेलनले स्थानीय कार्यकर्ताहरूलाई थप प्रेरित गर्दै संगठन सशक्तीकरणमा टेवा पुर्‍याउने अपेक्षा गरिएको छ। पार्टीको नीति, संगठन निर्माण, र आगामी कार्ययोजनाबारे स्पष्ट दृष्टिकोण सहित एमाले नेतृत्वलाई अझ प्रभावकारी बनाउने योजनाहरू प्रस्तुत गरियको नेकपा एमाले खानीखोला गाउँ कमिटीले जनाएको छ ।

भावी दिनमा संगठन निर्माण, नीति निर्माण, परिचालन, र जनताको प्रत्यक्ष सहभागितासहित एमाले अगाडि बढ्ने उद्घोषका साथ कार्यक्रम समापन गरिएको थियो।

• Jigyasa media