काठमाडौं, फागुन १४ — यही फागुन २१ गते हुने प्रतिनिधिसभा सदस्य निर्वाचनलाई सुरक्षित, व्यवस्थित र भयरहित वातावरणमा सम्पन्न गराउन निर्वाचन आयोगले देशभरका अस्पताल तथा स्वास्थ्य संस्थामा स्वास्थ्यकर्मी तयारी अवस्थामा राख्न निर्देशन दिएको छ।

आयोगका सहसचिव एवं प्रवक्ता नारायणप्रसाद भट्टराईका अनुसार स्वीकृत कार्यतालिकाअनुसार निर्वाचनका व्यवस्थापकीय काम तीव्र रूपमा अघि बढिरहेका छन्। मतदान केन्द्रमा खटिने कर्मचारी, सुरक्षाकर्मी तथा मतदान गर्न आउने मतदातालाई आवश्यक पर्न सक्ने आकस्मिक स्वास्थ्य सहायता सेवा उपलब्ध गराउने व्यवस्था मिलाउन आयोगले सम्बन्धित निकायलाई स्पष्ट निर्देशन दिएको छ।

मन्त्रालयहरूलाई पत्राचार, स्थानीय तहसँग समन्वय

आयोगले स्वास्थ्य तथा जनसङ्ख्या मन्त्रालय र संघीय मामिला तथा सामान्य प्रशासन मन्त्रालयलाई देशभरका अस्पतालमा चिकित्सक, स्वास्थ्यकर्मी तथा अत्यावश्यक औषधि तयारी अवस्थामा राख्न औपचारिक पत्राचार गरेको जनाएको छ।

संघीय मामिला मन्त्रालयमार्फत सबै स्थानीय तहलाई आवश्यक सहयोग गर्न आग्रह गरिएको छ। आकस्मिक तथा आपतकालीन उपचार सेवा निर्वाचन अवधिभर अवरुद्ध नहुने गरी तयारी मिलाउन आयोगले जोड दिएको छ।

तीन दिन सार्वजनिक बिदा, सरकारी संरचना उपयोग

मतदाताको सार्थक सहभागिता सुनिश्चित गर्न मतदानको दिनअघि र पछिको दिनसमेत गरी तीन दिन सार्वजनिक बिदा सिफारिस गरिएअनुसार नेपाल सरकारले निर्णय गरिसकेको छ।

यसैगरी, मतदान प्रक्रिया व्यवस्थित गर्न मतदान केन्द्र कायम गरिएका शिक्षण संस्था, स्वास्थ्यचौकी, वडा कार्यालयलगायतका सरकारी संरचना र तिनमा रहेका भौतिक सम्पत्ति फागुन १९ देखि २१ गतेसम्म उपयोग गर्न आवश्यक समन्वय गर्न आयोगले गृह मन्त्रालयमार्फत सम्बन्धित निकायमा पत्राचार गरिसकेको जनाएको छ।

सबै तहको सहकार्य अपरिहार्य

आयोगले संघीय, प्रदेश र स्थानीय सरकारसहित सबै सरोकारवाला निकायलाई आवश्यक सहयोग सुनिश्चित गर्न आग्रह गर्दै निर्वाचनलाई स्वच्छ, स्वतन्त्र र भयरहित वातावरणमा सम्पन्न गराउन संयुक्त प्रयास अपरिहार्य रहेको स्पष्ट पारेको छ।

निर्वाचनलाई केवल मतदान प्रक्रिया मात्र नभई समग्र राष्ट्रिय जिम्मेवारीका रूपमा लिँदै आयोगले तयारीलाई उच्च प्राथमिकतामा राखेको जनाएको छ।

• Jigyasanepal