काठमाडौं – भारतको राजधानी दिल्लीमा २७ वर्षपछि भारतीय जनता पार्टी (भाजपा) सत्तामा फर्किएको छ। पछिल्लो विधानसभा निर्वाचनमा भाजपा प्रमुख प्रतिस्पर्धी अरविन्द केजरीवाल नेतृत्वको आम आदमी पार्टी (आप)लाई पराजित गर्दै विजयी भएको हो।

निर्वाचन आयोगका पछिल्ला विवरण अनुसार, भाजपा २ सिट जितिसकेको छ भने ४६ सिटमा अग्रता लिएको छ। कुल ४८ सिटमध्ये भाजपा बहुमतमा उभिएको देखिन्छ। उता आपले २ सिट जितेर २० सिटमा अग्रता कायम राखेको छ। कांग्रेस भने कुनै सिट जित्न असफल भएको छ।

ठूलो राजनीतिक परिवर्तन, केजरीवाल पराजित

दिल्लीको मुख्यमन्त्री अरविन्द केजरीवाल आफ्नै निर्वाचन क्षेत्र नयाँ दिल्लीबाट पराजित भएका छन्। साथै, आपका वरिष्ठ नेता मनीष सिसोदिया (जंगपुरा) र सत्येन्द्र जैन पनि पराजित भएका छन्। तर, आतिशीले कालकाजीबाट जित हात पार्दै आपका केही सम्भावनाहरू जोगाएकी छन्।

भाजपाको विजयोत्सव र मोदीको सम्बोधन तयारी

भाजपाको यो ऐतिहासिक जितसँगै दिल्ली भाजपा मुख्यालयमा विजयोत्सव सुरु भएको छ। विजय पछि भाजपा उम्मेदवार प्रवेश वर्माले गृहमन्त्री अमित शाहसँग भेटवार्ता गरेका छन्। भारतीय सञ्चारमाध्यमहरूका अनुसार प्रधानमन्त्री नरेन्द्र मोदी साँझ ७ बजे पार्टी मुख्यालय पुगेर सम्बोधन गर्ने छन्।

भाजपाको सिटमा ६ गुणा वृद्धि

सन् २०२० को निर्वाचनमा भाजपाले जम्मा ८ सिट जितेको थियो, तर यो पटक ४८ सिट जित्दै ६ गुणा बढी सिट थप्न सफल भएको छ। केजरीवाल भाजपा उम्मेदवार प्रवेश वर्मासँग ३,००० मतले पराजित भएका छन्।

दिल्लीको राजनीतिक समीकरणमा ठूलो परिवर्तन

यस निर्वाचन परिणामसँगै दिल्लीको राजनीतिक सन्तुलन फेरिएको छ। विगत दशकदेखि दिल्लीमा शासन गर्दै आएको आपको प्रभाव खस्कँदै गएको संकेत यो नतिजाले देखाएको छ। भाजपाले इतिहास दोहोर्याउँदै राजधानीमा पुनः प्रभुत्व जमाउन सफल भएको छ।

• Jigyasa media