काठमाडौं, २०८१ कार्तिक २३ – गण्डकी प्रदेशका सांसद राजीव गुरुङ ‘दिपक मनाङ्गे’ ले आफूविरुद्धको फैसलाको पूर्णपाठ आएपछि मात्रै अदालतमा उपस्थित हुने बताएका छन्। सर्वोच्च अदालतले ज्यान मार्ने उद्योगसम्बन्धी कसुरमा पाँच वर्ष कैद सजायको पाटन पुनरावेदन अदालतको फैसलालाई सदर गरेपछि उनी सम्पर्कविहीन भएका थिए।
शुक्रबार जारी गरेको विज्ञप्तिमा मनाङ्गेले सर्वोच्च अदालतको निर्णयको पूर्णपाठ नआएसम्म अदालतमा नजाने बताएका छन्। "फैसलाको नक्कल सार्न कानून व्यवसायीलाई पठाएको थिएँ, तर अदालतबाट संक्षिप्त पाठ नै तयार नभएको जानकारी आयो," उनले विज्ञप्तिमा भनेका छन्। "पूर्णपाठ लिखित रुपमा प्राप्त भएपछि म अदालतमा स्वयम् उपस्थित हुने जानकारी गराउन चाहन्छु।"
मनाङ्गेले यसअघि नै दुई वर्ष ८ महिना जेल सजाय काटिसकेका छन्। उनलाई अब थप २ वर्ष ४ महिना कैद सजाय भुक्तान गर्न बाँकी छ।
- Jigyasa media
