झापा – झापा गाउँपालिका–६ पुष्पाञ्जली टोलकी ८३ वर्षीया फूलमाया मुर्मुको विभत्स हत्या भएको छ। शनिबार अपराह्न घरमै हत्या गरिएको अवस्थामा उनको शव फेला परेको हो।
प्रहरीले घटनामा संलग्न रहेको आशंकामा झापा गाउँपालिका–७ का २८ वर्षीय अजय यादव र शिवसताक्षी नगरपालिका–७ का २४ वर्षीय अशोक यादवलाई पक्राउ गरेको छ। प्रहरी नायब उपरीक्षक (डीएसपी) कृष्णकुमार चन्दका अनुसार, घटनास्थलबाट प्रमाण सङ्कलन गर्न कुकुरसहितको टोली परिचालन गरिएको थियो।
अनुसन्धानका क्रममा वृद्धालाई कलको ह्यान्डिल र फरुवाले टाउको र अनुहारमा प्रहार गरी हत्या गरिएको पुष्टि भएको छ। डीएसपी चन्दले बताएअनुसार, यादवद्वयलाई झापा गाउँपालिका–७ स्थित मदरगाछ क्षेत्रबाट पक्राउ गरिएको हो।
हाल पक्राउ परेका अभियुक्तहरूमाथि सोधपुछ जारी रहेको छ। प्रहरीले हत्या गरिनुको उद्देश्य र घटनाको पछाडिको कारण पत्ता लगाउन थप अनुसन्धान अघि बढाएको छ।
- Jigyasa media
