म्याग्दी ।: धौलागिरि हिमाल आरोहणका क्रममा ज्यान गुमाएका पाँच रसियन पर्वतारोहीको शव संकलन गरी आज काठमाडौं पठाइएको छ। ७,१०० मिटर उचाइमा मृत अवस्थामा फेला परेका ती आरोहीहरूका शव हेलिकप्टरमार्फत काठमाडौं पठाइएको जिल्ला प्रहरी कार्यालय म्याग्दीका प्रमुख प्रहरी नायब उपरीक्षक भरत श्रेष्ठले जानकारी दिएका छन्।

उद्धारका लागि एयर अल्टिच्युड कम्पनीको हेलिकप्टरमार्फत पुगेको शेर्पा टोलीले शवलाई इटली आधार शिविरसम्म झारेका थिए। ती शवलाई काठमाडौँस्थित त्रिवि शिक्षण अस्पतालमा थप प्रक्रिया पूरा गर्न पठाइएको हो।

यी पाँच आरोहीहरू असोज २१ गते, ७,६०० मिटरको उचाइबाट सम्पर्कविहीन भएका थिए। उनीहरूलाई असोज २३ गते मृत अवस्थामा फेला पारिएको थियो। प्रतिकूल मौसम र कठिन भूगोलका कारण शव सङ्कलनमा ढिलाइ भएको प्रहरी स्रोतले जनाएको छ। उद्धारकर्ताहरूले हेलिकप्टरबाट रस्सीमा झुन्डिएर शवहरू निकाल्न सफल भएका थिए।

यो दुःखद घटना रसियन आरोहीहरूको धौलागिरि हिमाल आरोहण प्रयासको क्रममा घटेको हो। उनीहरूमध्ये केही आरोहण सफल गरे भने अन्यले बीचैमा यात्रा रद्द गरेका थिए।

• Jigyasa media