विराटनगर, भदौ ११ - विराटनगर महानगरपालिका-१८ भेडियारीकी २७ वर्षीया रुपादेवी मण्डलको मंगलबार बिहान विषालु सर्पको डसाइबाट मृत्यु भएको छ। परिवारका सदस्यका अनुसार, बिहान ४ बजे आँगनमा फूल टिप्ने क्रममा उनलाई सर्पले डसेको थियो।
गम्भीर अवस्थामा रहेकी रुपादेवीलाई तत्कालै उपचारका लागि विराटनगरको कोशी अस्पताल पुर्याइयो। तर, अस्पतालमा पुर्याउने बित्तिकै चिकित्सकहरूले उनलाई मृत घोषणा गरेका छन्।
मोरङ प्रहरीका प्रवक्ता डीएसपी ज्ञानेन्द्रबहादुर बस्नेतका अनुसार, रुपादेवीलाई कुन प्रकारको सर्पले टोकेको थियो भन्ने यकिन भएको छैन। चिकित्सकहरूले सर्पको डसाइबाट मृत्यु भएको पुष्टि गरेका छन्।
- Jigyasa media
