सियोल, ६ कात्तिक । उत्तर कोरियाले रूसमा सेना पठाउने तयारी गरिरहेको खबरले दक्षिण कोरिया र नेटोका प्रमुखहरूलाई गम्भीर चिन्तामा पारेको छ। दक्षिण कोरियाका राष्ट्रपति युन सुक योल र नेटो महासचिव मार्क रुटबीच यस विषयमा फोन वार्ता भएको हो, जसमा दुवैले उत्तर कोरियाको कदमले अन्तर्राष्ट्रिय सुरक्षा व्यवस्था र शान्तिलाई चुनौती दिएको बताएका छन्।

राष्ट्रपति युनले रूस र उत्तर कोरियाबीचको सैन्य सहयोगले कोरियाली प्रायद्वीप, इन्डो-प्यासिफिक, र एटलान्टिक क्षेत्रको सुरक्षामा गम्भीर खतरा उत्पन्न गराउने चेतावनी दिए। उनले दक्षिण कोरिया र नेटोबीचको सहकार्यलाई सुदृढ गर्दै, प्योङयाङ र मस्कोको सैन्य सम्बन्धको विरुद्धमा रणनीतिक कदम चाल्नुपर्नेमा जोड दिए।

नेटो महासचिव रुटले उत्तर कोरियाले रूसमा सेना पठाउन लागेको निर्णय अन्तर्राष्ट्रिय कानुन र संयुक्त राष्ट्रसंघीय सुरक्षा परिषद्का प्रस्तावहरूको उल्लंघन भएको भन्दै कडा आपत्ति जनाए। उनले यस निर्णयको विरुद्धमा दक्षिण कोरियालाई समर्थन गर्न नेटो तयार रहेको र यस मुद्दामा दक्षिण कोरिया, युक्रेन, र नेटोबीचको रक्षा सहयोग अझ बलियो बनाउन आवश्यक रहेको बताए।

दुवै नेताले रूस र उत्तर कोरियाबीचको सैन्य सहकार्यलाई नजिकबाट निगरानी गर्दै संयुक्त प्रतिक्रियाका लागि तयारी अवस्थामा रहने सहमति गरेका छन्।

यसैबीच, दक्षिण कोरियाको नेसनल इन्टेलिजेन्स सर्भिसका अनुसार उत्तर कोरियाले लगभग १२ हजार सेना रूसलाई सहयोग गर्न पठाउने योजना बनाएको छ, जसमध्ये १,५०० सेना रूसको सुदूर पूर्व क्षेत्रमा पुगेका छन्।

• Jigyasa media