काभ्रे ।

काभ्रे जिल्लाको धुलिखेल नगरपालिका नेपालको पहिलो 'स्वस्थ सहर'को रूपमा मान्यता पाएको छ। विश्व स्वास्थ्य संगठन (डब्लुएचओ) द्वारा मापदण्ड पूरा गर्दै 'स्वस्थ सहर'को सूचकांकमा दोस्रो स्तर प्राप्त गरेपछि धुलिखेललाई यो विशेष उपाधि प्रदान गरिएको हो। यस उपलब्धिसँगै धुलिखेल नगरपालिकाले ५ हजार अमेरिकी डलरको पुरस्कार जित्न सफल भएको छ।

धुलिखेल नगरपालिकाका मेयर अशोक कुमार ब्यान्जु श्रेष्ठले यो मान्यता प्राप्त गरेको जानकारी दिए। उनले भने, "नेपालमा पहिलोपटक धुलिखेल नगरपालिकाले यो उपाधि पाएको छ। यसका लागि विश्व स्वास्थ्य संगठनले तोकेका सबै मापदण्ड पूरा गरेका छौं।"

धुलिखेल नगरपालिकाले स्वास्थ्य क्षेत्रमा गरेको नीतिगत सुधार, वातावरणीय सुधार, गरिब जनताको स्वास्थ्य पहुँच, दीर्घरोग र सरुवा रोगहरूको व्यवस्थापन, सामुदायिक स्वास्थ्यमा सुधार तथा प्राथमिक स्वास्थ्य सेवामा स्थानीय सरकारको सक्रियतालाई ध्यानमा राखेर यो मान्यता प्रदान गरिएको हो।

मेयर श्रेष्ठले भने, "अब धुलिखेल नगरपालिका सर्ने-नसर्ने रोगहरूको व्यवस्थापन, ज्येष्ठ नागरिकको स्वास्थ्य, दलित र गरिब जनसमुदायको स्वास्थ्यमा दिगो विकासका कार्यक्रम तथा सहरी स्वास्थ्य सुशासनमा डब्लुएचओसँग मिलेर काम गर्नेछ।"

नगरपालिकाले अपांगता, स्वच्छ खानेपानी, वातावरणीय प्रभावको न्यूनीकरण, सामुदायिक स्वास्थ्य, र स्वास्थ्यमा डिजिटल अभिलेखको विकासजस्ता कार्यहरूमा उल्लेखनीय प्रगति गरेको थियो। यही कारणले धुलिखेल नगरपालिकाले यो प्रतिष्ठित मान्यता पाउन सफल भएको हो। 

यो उपलब्धिले धुलिखेल नगरपालिकाको अन्तर्राष्ट्रिय स्तरमा पहिचान स्थापित गर्दै, भविष्यमा स्वास्थ्य क्षेत्रमा अझै प्रभावकारी सुधारका लागि मार्ग प्रशस्त गरेको छ।

• Jigyasa media