जिग्यासा नेपाल | मंसिर १०, २०८१ | सोमबार

बागलुङ - चिसो मौसमले ढोरपाटन क्षेत्रमा रहेका विद्यालयहरूमा पठनपाठन प्रभावित बनाएको छ। बढ्दो चिसोका कारण ढोरपाटन नगरपालिका-९ चिसापानीस्थित ज्योति विकास माध्यमिक विद्यालय र छेन्तुङस्थित सिद्धबराह प्राथमिक विद्यालयका विद्यार्थी बिरामी पर्न थालेका छन्।

विद्यालयका प्रधानाध्यापक चकबहादुर अदैका अनुसार उच्च पहाडी क्षेत्रमा बिहान तुसारो पर्ने र दिउँसो सिरेटो चल्दा विद्यार्थीमा ज्वरो, रुघाखोकी र निमोनिया देखिन थालेको छ। यसले विद्यालयको नियमित पढाइमा बाधा पुर्‍याइरहेको छ।

विद्यालय बन्दको सम्भावना

पुस महिनासम्म पठनपाठन सञ्चालन गर्ने योजना भए पनि चिसोले गर्दा विद्यालय चाँडै बन्द गर्नुपर्ने अवस्था आएको प्रधानाध्यापक अदैले जानकारी दिए। बिहानको समयमा चिसो अत्यधिक हुने र १० बजेसम्म घाम नलाग्ने समस्या रहेको छ।

विद्यार्थीका लागि सुविधा अभाव

विद्यालयमा ‘हिटर’को व्यवस्था नभएकोले बालबालिकालाई चिसोबाट बचाउन कठिन भएको छ। “विद्यार्थी कठ्याङ्ग्रिएर पढ्न नसक्ने अवस्था छ,” प्रधानाध्यापक अदैले भने।

ढोरपाटन क्षेत्रमा हुने खाने परिवारले आफ्नो छोराछोरीलाई पोखरा, काठमाडौँजस्ता सहरी क्षेत्रका विद्यालयमा पढाउन थालेका छन्।

वार्षिक समस्या

जाडो महिनामा चिसोले गर्दा ढोरपाटन उपत्यकाका विद्यालयहरू हरेक वर्ष पुस दोस्रो सातादेखि बन्द हुने गरेका छन्। यस क्षेत्रमा रहेका ज्योति विकास माध्यमिक विद्यालय, सिद्धबराह प्राथमिक विद्यालय, सहलथान प्राथमिक विद्यालय, बाल ज्योति प्राथमिक विद्यालय, ढोरपाटन दुर्गम प्राथमिक विद्यालय र ढोरबहारा प्राथमिक विद्यालयमा पठनपाठनमा चिसोको असर गम्भीर देखिएको छ।

बालबालिकाको स्वास्थ्य र शिक्षा सुनिश्चित गर्न स्थानीय निकाय र सरोकारवालाहरूले तुरुन्त कदम चाल्न आवश्यक छ।

• Jigyasa media