काठमाण्डौ ।
कञ्चनपुरको भीमदत्त नगरपालिका-१२ स्थित महाकाली नदीमा दाउरा सङ्कलन गर्ने क्रममा दुई किशोर बग्दा एक जनाको मृत्यु भएको छ भने अर्को किशोर बेपत्ता भएका छन्।
प्रहरी निरीक्षक ईश्वर थापाका अनुसार, १८ वर्षीय सौरभ दमाई र १५ वर्षीय अबि दमाई महाकाली नदीमा दाउरा सङ्कलन गर्ने क्रममा बगेका थिए। घटनापछि सौरभको शव दोधारा चाँदनी झोलुङ्गे पुल नजिकै महाकाली नदीको किनारमा फेला परेको छ।
अर्का किशोर अबि दमाईको अवस्था अझै अज्ञात छ। स्थानीयवासी र सुरक्षाकर्मीको टोलीले उनको खोजी कार्य जारी राखेको छ। लगातारको वर्षाका कारण महाकाली नदीमा पानीको बहाव उच्च भएकोले खोजी कार्यमा चुनौती थपिएको प्रहरीले जानकारी दिएको छ।
- Jigyasa media
