काठमाण्डौ ।
काठमाडौँका विभिन्न स्थानमा यात्रुसँग बढी भाडा असुल्ने क्रम बढेपछि ट्राफिक प्रहरीले आज १७ जनालाई नियन्त्रणमा लिएको छ। बल्खुबाट ८ जना, नयाँ बसपार्कबाट ६ जना, र कोटेश्वरबाट ३ जना गरी १७ जनालाई पक्राउ गरिएको हो।
यसअघि हिजो पनि बल्खुबाट १० जना, नयाँ बसपार्कबाट २ जना, र कोटेश्वरबाट २ जना गरी १४ जनालाई नियन्त्रणमा लिइएको थियो। पक्राउ परेकाहरूमाथि आवश्यक कारबाहीका लागि सम्बन्धित प्रहरी वृत्तहरूमा बुझाइएको छ।
प्रवक्ता प्रहरी नायब उपरीक्षक रविन कार्कीका अनुसार चेकजाँचका क्रममा निजी नम्बर प्लेट भएका दुई सवारी साधनले नियम विपरीत भाडामा यात्रु बोकिरहेको अवस्थामा पक्राउ गरिएको छ।
चाडपर्वका समयमा यात्रुलाई पर्ने समस्यालाई समाधान गर्न ट्राफिक प्रहरीले काठमाडौँ उपत्यकामा १४ स्थानमा सहायता कक्ष स्थापना गरेको छ। चाडपर्व लक्षित ट्राफिक व्यवस्थापन विशेष कार्ययोजना-२०८१ को प्रभावकारी कार्यान्वयन गर्दै, जनशक्ति परिचालन गरिएको छ।
प्रवक्ता कार्कीका अनुसार बढी भाडा असुल्ने, सवारी साधनमा २ चालक नराख्ने, भाडादर टाँस्न नमान्ने, फर्जी टिकट काट्ने जस्ता गतिविधिमा कडाई गरिएको छ। केही दिनअघि नयाँ बसपार्कबाट नक्कली टिकटसहित एक जना पक्राउ परेका थिए।
यदि यात्राका क्रममा कुनै पनि समस्या देखिएमा, बढी भाडा असुलिएको वा कुनै हैरानी भएमा तत्काल ट्राफिक प्रहरीको हटलाइन १०३ वा प्रहरी हटलाइन १०० मा सम्पर्क गर्न अनुरोध गरिएको छ।
- Jigyasa media
