वीरगञ्ज – सामाजिक सञ्जालमार्फत अपशब्द प्रयोग गरी अराजक गतिविधि फैलाएको आरोपमा वीरगञ्ज महानगरपालिका–१५ का २१ वर्षीय ओमकुमार पटेललाई प्रहरीले पक्राउ गरेको छ।
जिल्ला प्रहरी कार्यालय पर्साका अनुसार, पटेलले फेसबुक, टिकटक, ट्वीटर, र ह्वाट्सएपजस्ता सामाजिक सञ्जालमा 'किङ्स अफ पर्सा' नामक खाताबाट अश्लील भाषा प्रयोग गर्दै हातहतियार प्रदर्शन गरेका थिए, जसले समाजमा डर र त्रास फैलाएको थियो।
प्रहरी नायब उपरीक्षक दीपक भारतीले बताए अनुसार, पटेलले समाजमा द्वन्द्व र असामाजिक गतिविधि उत्पन्न गर्ने खालका गतिविधिमा संलग्न भएकाले उनलाई नियन्त्रणमा लिइएको हो। सार्वजनिक शान्ति भंग गर्ने कसुरमा अनुसन्धान जारी रहेको छ भने यो घटनामा संलग्न अन्य व्यक्तिहरूको खोजी भइरहेको प्रहरीले जनाएको छ।
- Jigyasa media
