जिज्ञासा नेपाल –l। जेठ २३, सप्तरी

सप्तरीको सुरुङ्गा नगरपालिका–८ मा डाका समूहले लुटपाट गर्दै एक व्यक्तिको हत्या गरेका छन्। बिहीबार राति भएको घटनामा घरधनी कान्तलाल चौधरीको हत्या गरिएको जिल्ला प्रहरी कार्यालय सप्तरीले पुष्टि गरेको छ।

डाका समूहले चौधरीको घरमा धावा बोल्दै सुनचाँदीका गरगहना र नगद रकम लुटेका थिए। लुटपाटका क्रममा चौधरीमाथि निर्मम आक्रमण गरिएको थियो, जसका कारण उनको घटनास्थलमै ज्यान गएको बताइएको छ। यसैबीच, डाकाको आक्रमणमा परेका चौधरीका भाइ रमाकान्त गम्भीर घाइते भएका छन्।

घटनापछि इलाका प्रहरी कार्यालय र जिल्ला प्रहरी कार्यालयबाट संयुक्त टोली परिचालन गरिएको छ। डाका समूहको पहिचान खुल्न नसकेको भए पनि खोजी तीव्र पारिएको प्रहरी प्रमुख ढकेन्द्र खतिवडाले जानकारी दिए।

स्थानीयवासीले रातिको समयमा प्रहरी गस्तीको अभाव र सुरक्षा व्यवस्थामा कमजोरी देखिएको भन्दै चिन्ता व्यक्त गरेका छन्।
यसरी डाका समूह खुलेआम घर पसेर हत्या र लुटपाट गरिरहेको अवस्था कानून व्यवस्थामाथि गम्भीर प्रश्न खडा गरिरहेको छ।

🔴 सुरक्षा चुनौती बढ्दो
सुरुङ्गामा डाकाको यो घटना पछिल्लो समय बढ्दै गएको आपराधिक गतिविधिको प्रतिनिधि बनेको छ। स्थानीय सरकारले समेत घटनाको छानबिन र दोषीलाई कडा कारबाहीको माग गर्दै केन्द्र र प्रदेश सरकारलाई ध्यानाकर्षण गराएको छ।

• Jigyasanepal