काठमाडौं । रसुवामा आएको बाढी तथा अन्य विपद्का पीडितलाई राहत तथा पुनःस्थापनाका लागि प्रयोग हुने प्रधानमन्त्री दैवी प्रकोप उद्धार कोषमा १३ अर्ब २३ करोड १० लाख ८१ हजार २६७ रुपैयाँ मौज्दात रहेको छ।
प्रधानमन्त्री तथा मन्त्रिपरिषद्को कार्यालयका अनुसार शुक्रबार साँझ ५ बजेसम्म विभिन्न नौवटा बैंकमा ९ अर्ब ६८ करोड २३ लाख ५५ हजार २५ रुपैयाँ जम्मा भएको छ।
त्यसैगरी, कोषका दुईवटा बैंक खातामा अमेरिकी डलरसमेत मौज्दात रहेको जनाइएको छ। ती खातामा २ करोड ३२ लाख ८४ हजार ७७ अमेरिकी डलर जम्मा भएको कार्यालयको विवरणमा उल्लेख छ।
यसअघि भदौ १० गते रसुवाको भोटेकोशी हुँदै त्रिशूली नदीमा आएको बाढीबाट प्रभावित नागरिकका लागि कोषबाट १ अर्ब रुपैयाँ निकासा गरिएको थियो। उक्त रकम राष्ट्रिय विपद् जोखिम न्यूनीकरण तथा व्यवस्थापन प्राधिकरणमार्फत राहत तथा उद्धारका लागि परिचालन गरिएको हो।
रसुवामा आएको बाढीले ठूलो जनधनको क्षति गरेपछि प्रभावित क्षेत्रका नागरिकको उद्धार, राहत र पुनःस्थापनाका लागि सरकारी संयन्त्र सक्रिय रहँदै आएको छ।
-
Jigyasanepal
