काठमाडौं । साताको पहिलो कारोबार दिन सोमबार नेपाल स्टक एक्सचेन्ज (नेप्से) परिसूचक दोहोरो अंकले घट्दै २६२७.११ विन्दुमा बन्द भएको छ। सोमबार नेप्से २६.२९ अंकले ओरालो लागेसँगै बजारका सबै उपसूचक पनि घटेका छन्।

आजको कारोबारमा ३५६ कम्पनीका ७५ लाख ४० हजार कित्ता सेयर ४६ हजार २४६ पटक खरिद–बिक्री हुँदा कुल ३ अर्ब ५५ करोड ७९ लाख ८१ हजार रुपैयाँ बराबरको कारोबार भएको छ। अघिल्लो कारोबार दिनको तुलनामा कारोबार रकम पनि घटेको हो।

कारोबारमा ३४ कम्पनीको सेयर मूल्य बढ्दा २३९ कम्पनीको मूल्य घटेको छ भने ४ कम्पनीको सेयर मूल्य स्थिर रहेको छ।

सोमबार स्नो रिभर्स, सानिगाड हाइड्रो र कालंगा हाइड्रोको सेयर मूल्यमा सकारात्मक सर्किट लागेको छ। यता थ्रि स्टार हाइड्रोपावरको सेयर मूल्य भने सबैभन्दा धेरै १३.७९ प्रतिशतले घटेको छ।

कारोबार रकमका आधारमा ८.५ प्रतिशत नेपाल इन्भेष्टमेन्ट बैंक डिबेञ्चर २०८४ सबैभन्दा अगाडि रह्यो। उक्त ऋणपत्रको मात्रै ५३ करोड ९४ लाख रुपैयाँ बराबरको कारोबार भएको छ।

यस दिन बजारका १३ वटै उपसमूहका परिसूचक ओरालो लागेका छन्। तीमध्ये व्यापार उपसमूह सबैभन्दा धेरै ३.१५ प्रतिशतले घट्दै सर्वाधिक प्रभावित बनेको छ।

• Jigyasanepal