काठमाडौं।
साताको दोस्रो कारोबार दिन सेयर बजार सामान्य अंकले बढ्दै हरियालीतर्फ उन्मुख भएको छ। नेपाल स्टक एक्सचेन्ज (नेप्से) परिसूचक ६.७४ अंकले बढेर २६०१.६१ विन्दुमा कायम भएको छ। बजार ०.२५ प्रतिशतले उकालो लागेको हो।
सामान्य सुधार देखिएको बजारमा अधिकांश कम्पनीको सेयर मूल्य बढेको छ। कुल कारोबार भएका कम्पनीमध्ये १५५ कम्पनीको सेयर मूल्यमा वृद्धि आएको छ भने ९४ कम्पनीको मूल्य घटेको छ।
सोमबार बजारमा ७७ लाख ५७ हजार ६२५ कित्ता सेयर किनबेच हुँदा कुल कारोबार रकम ३ अर्ब ४४ करोड १९ लाख ३ हजार ७७० रुपैयाँ पुगेको छ, जसले बजारमा लगानीकर्ताको सक्रियता देखाएको छ।
कारोबार रकमका आधारमा स्वस्तिक लघुवित्त, एसवाई प्यानल नेपाल, स्वेत–गंगा हाइड्रो, ओम मेगाश्री फर्माटिकल्सलगायतका कम्पनी शीर्ष स्थानमा रहे।
तर सबै कम्पनीका लागि दिन अनुकूल भने रहेन। हिमस्टार ऊर्जा, एनएमबि माइक्रोफाइनान्स, खानीखोला हाइड्रो, ज्योति विकास बैंक बोण्ड र बाराही हाइड्रोलगायतका कम्पनीका सेयरधनीले उच्च गुमावट बेहोरे।
समूहगत सूचकतर्फ हेर्दा होटेल तथा पर्यटन, लगानी, माइक्रोफाइनान्स, म्युचुअल फण्ड र अन्य समूह घटेका छन् भने बाँकी अधिकांश समूहमा वृद्धि देखिएको छ।
-
Jigyasanepal
