काठमाडौं । मौसममा विभिन्न प्रणालीको प्रभाव कायमै रहेकाले आज देशका अधिकांश भूभागमा बदलीसँगै वर्षा र हिमपातको सम्भावना रहेको छ। मौसम पूर्वानुमान महाशाखाले केही स्थानमा भारी वर्षा हुनसक्ने चेतावनी समेत दिएको छ।

महाशाखाका अनुसार दिउँसो देशभर सामान्यतया बदली रहनेछ। कोशी, बागमती र गण्डकीका हिमाली क्षेत्रका केही स्थान तथा लुम्बिनी, कर्णाली र सुदूरपश्चिमका हिमाली भूभागका थोरै स्थानमा मेघगर्जन र चट्याङसहित हल्कादेखि मध्यम वर्षा तथा हिमपात हुनसक्नेछ।

देशका पहाडी क्षेत्रमा पनि केही स्थानमा चट्याङसहित वर्षाको सम्भावना छ। यस्तै, बागमती, गण्डकी, लुम्बिनी र सुदूरपश्चिमका तराई क्षेत्रमा केही स्थान तथा मधेश र कोशीका तराई भूभागका थोरै स्थानमा मध्यम वर्षा हुनसक्ने अनुमान गरिएको छ।

यी क्षेत्रमा भारी वर्षाको जोखिम

महाशाखाका अनुसार कोशी र कर्णालीका पहाडी भूभाग तथा बागमती, गण्डकी र लुम्बिनीका पहाडी एवं तराई क्षेत्रका एक–दुई स्थानमा भारी वर्षा हुनसक्ने सम्भावना छ।

रातिको समयमा पनि देशभर सामान्यतया बदली रहनेछ। हिमाली क्षेत्रका थोरै स्थानमा मेघगर्जन र चट्याङसहित मध्यम वर्षा तथा हिमपात हुनसक्नेछ। पहाडी र तराई भूभागका केही स्थानमा पनि चट्याङसहित मध्यम वर्षाको सम्भावना छ।

राति लुम्बिनी र सुदूरपश्चिम प्रदेशका तराई भूभागका एक–दुई स्थानमा भारी वर्षा हुनसक्ने पूर्वानुमान गरिएको छ।

बाढी–पहिरोको जोखिममा सतर्कता अपनाउन आग्रह

मेघगर्जन, चट्याङ र भारी वर्षाका कारण नदी तथा खोलामा पानीको बहाव बढ्न सक्ने, पहाडी क्षेत्रमा पहिरोको जोखिम बढ्न सक्ने र सडक यातायात तथा दैनिक जनजीवन प्रभावित हुनसक्ने भएकाले आवश्यक सावधानी अपनाउन मौसम पूर्वानुमान महाशाखाले आग्रह गरेको छ।

• Jigyasanepal