कञ्चनपुर, वैशाख २४ — कञ्चनपुरमा दुई मोटरसाइकल एकआपसमा ठोक्किँदा एक जनाको मृत्यु भएको छ भने दुई जना घाइते भएका छन्।
दुर्घटना शुक्लाफाटा नगरपालिका–८ स्थित भित्री सडकखण्डमा भएको हो। म.२ प ५०५५ नम्बरको मोटरसाइकल र से.६ प ५९१३ नम्बरको मोटरसाइकल आपसमा ठोक्किँदा गम्भीर दुर्घटना भएको जिल्ला प्रहरी कार्यालय कञ्चनपुर ले जनाएको छ।
दुर्घटनामा से.६ प ५९१३ नम्बरको मोटरसाइकल चालक शुक्लाफाटा नगरपालिका–८ पारीफाटाका ४५ वर्षीय मिन बहादुर जागरी गम्भीर घाइते भएका थिए। उनलाई उपचारका लागि सेती प्रादेशिक अस्पताल धनगढी लगिएको थियो। तर उपचारकै क्रममा बुधबार बेलुका उनको मृत्यु भएको प्रहरीले जनाएको छ।
दुर्घटनामा सोही मोटरसाइकलमा पछाडि सवार ५५ वर्षीय मंगल महरा तथा अर्को मोटरसाइकल चालक ४२ वर्षीय कम्मान सिंह ठगुन्ना घाइते भएका छन्।
घाइते दुवैजनाको धनगढीस्थित मायामेट्रो अस्पताल मा उपचार भइरहेको प्रहरीले जनाएको छ।
-
Jigyasanepal
