धनगढी । कैलालीमा सर्पको टोकाइबाट एकै घरका दुई बालिकाको मृत्यु भएको छ। गौरीगंगा नगरपालिका-७ महुलियामा शनिबार दिउँसो भएको घटनामा स्थान घर्तीमगरकी छोरीहरू ७ वर्षीया काजल र ४ वर्षीया नीताको ज्यान गएको हो। जिल्ला प्रहरी कार्यालय कैलालीका प्रमुख एसपी पदमबहादुर विष्टले घटनाबारे जानकारी दिएका छन्।

सर्पले टोकेपछि बालिकाहरूलाई उपचारका लागि सेती प्रादेशिक अस्पताल लगिएको थियो, तर उपचारकै क्रममा उनीहरूको मृत्यु भयो। घटनामा बालिकाकी ५५ वर्षीया हजुरआमा रिजु घर्तीमगर पनि सर्पको टोकाइबाट घाइते भएकी छन्, जसको उपचार सेती प्रादेशिक अस्पतालमा भइरहेको छ।

यसैगरी, शनिबार कैलालीमा सर्पको टोकाइबाट अरु तीन जना पनि घाइते भएका छन्। धनगढी उपमहानगरपालिका-१ का १३ वर्षीय उपेन्द्र केसी, गौरीगंगा नगरपालिका-५ का १४ वर्षीय हेम बोहरा, र जोशीपुर गाउँपालिका-३ की ३४ वर्षीया उर्मिला कठरिया घाइते भएको प्रहरीले जानकारी दिएको छ। 

घाइते केसी र बोहराको सेती प्रादेशिक अस्पतालमा, र कठरीयाको मसुरियास्थित सर्पदंश उपचार केन्द्रमा उपचार भइरहेको एसपी विष्टले बताए।

• Jigyasa media