काठमाडौं, कात्तिक २७ - यूएईमा भइरहेको आइसिसी यु-१९ महिला टि-२० विश्वकप एसिया छनोट अन्तर्गत नेपालले कुवेतलाई १६५ रनको फराकिलो अन्तरले पराजित गरेको छ। कप्तान पूजा महतोको ऐतिहासिक शतक र ५ विकेटको शानदार प्रदर्शनले नेपाललाई यो उपलब्धि दिलायो।
नेपालले टस जितेर पहिला ब्याटिङ गर्ने निर्णय गर्दै २० ओभरमा २ विकेट गुमाएर २१३ रनको विशाल स्कोर बनायो। पूजाले ६९ बलमा १७ चौकासहित नट आउट १३० रन बनाउँदै प्रतियोगितामा पहिलो शतक बनाइन्। पूजाको यो प्रदर्शनले नेपाली महिला क्रिकेटमा नयाँ रेकर्ड राखेको छ। यसअघिको सबैभन्दा उच्च व्यक्तिगत स्कोर पनि यही प्रतियोगितामा युएईकी लाभन्या केन्याले बनाएको ९९ रनको थियो, जुन अब पूजाले पार गरिन्।
कुवेतले नेपालद्वारा प्रस्तुत २१४ रनको लक्ष्य पछ्याउने क्रममा १३ ओभरमै ४८ रनमा अलआउट भयो। कुवेतका कप्तान जिफा जिलानीले ३६ रन बनाइन् भने अन्य खेलाडीले दोहोरो अंकमा रन बनाउन सकेनन्। पूजाले ४ ओभरमा मात्र ८ रन दिएर ५ विकेट लिइन्, जबकि रचना चौधरी र सिमाना केसीले समान २-२ विकेट हात पारे।
प्रतियोगिताको अन्तिम खेलमा नेपालले कात्तिक २८ मा यूएईसँग प्रतिस्पर्धा गर्नेछ। चार टोली सहभागी यस छनोट प्रतियोगितामा शीर्ष स्थान प्राप्त गर्ने टोलीले सन् २०२५ मा मलेसियामा हुने विश्वकपमा स्थान सुरक्षित गर्नेछ।
- Jigyasa media
