काठमाडौं । काठमाडौँ उपत्यकामा आज (बुधबार) पनि वर्षाको सम्भावना रहेको छ। मौसम पूर्वानुमान महाशाखाका अनुसार उपत्यकामा हल्कादेखि मध्यमसम्म वर्षा हुन सक्ने देखिएको हो।
मौसमविद् सरोज पुडासैनीका अनुसार बिहानैदेखि उपत्यकाको आकाश बादलले ढाकिएको छ र दिनभरि मौसम यस्तै रहने सम्भावना छ। हाल उपत्यकाको भिजिबिलिटी (दृश्यता) करिब ६ हजार मिटर रहेको छ।
आज बिहान ५:४५ बजेको प्रारम्भिक मापनअनुसार काठमाडौँ उपत्यकाको न्यूनतम तापक्रम १७.४ डिग्री सेल्सियस रहेको छ। यद्यपि, वास्तविक न्यूनतम तापक्रम बिहान ८:४५ बजे मापन गरिने भएकाले यो तापक्रम केही घट्न सक्ने वा यथावत् रहन सक्ने अनुमान गरिएको छ।
हिजो (मंगलबार) उपत्यकाको न्यूनतम तापक्रम १८.४ डिग्री सेल्सियस र अधिकतम तापक्रम २७.५ डिग्री सेल्सियस मापन गरिएको थियो।
मौसम महाशाखाले देशभरको विस्तृत मौसम पूर्वानुमान भने बिहान ८ बजे सार्वजनिक गर्ने जनाएको छ।
-
Jigyasanepal
