काठमाडौं, साउन १५ । पाकिस्तानको काराकोरम पर्वतशृंखलामा अवस्थित ८,०४७ मिटर अग्लो ब्रड पिक हिमालमा हिमपहिरो जाँदा नेपालीमूलका विश्वप्रसिद्ध पर्वतारोही निर्मल पुर्जा (निम्सदाइ) नेतृत्वको १० सदस्यीय अन्तर्राष्ट्रिय आरोही टोली सम्पर्कविहीन भएको छ।
पाकिस्तानी पर्वतारोहण अधिकारीहरूका अनुसार बिहीबार दिउँसो हिमपहिरो गएको हो। त्यसयता टोलीसँग कुनै सम्पर्क हुन नसकेको जनाइएको छ।
टोलीमा पाँच नेपाली सहित एक अमेरिकी, एक चिनियाँ, एक ओमानी तथा अन्य विदेशी आरोही सहभागी रहेको बताइएको छ। उनीहरूको अवस्थाबारे हालसम्म आधिकारिक जानकारी प्राप्त हुन सकेको छैन।
मौसम अनुकूल भए हेलिकोप्टरमार्फत खोज तथा उद्धार अभियान सञ्चालन गरिने तयारी भइरहेको छ। पाकिस्तानको अल्पाइन क्लबले सरकारी निकायसँग समन्वय गरी उपलब्ध सबै स्रोत परिचालन गर्दै खोज तथा उद्धार कार्य अघि बढाइएको जनाएको छ।
निर्मल पुर्जा सन् २०१९ मा विश्वका ८ हजार मिटरभन्दा अग्ला सबै १४ हिमाल करिब ६ महिनाभित्र आरोहण गरी विश्व कीर्तिमान कायम गर्ने नेपाली पर्वतारोही हुन्। उनको यो उपलब्धिले विश्व पर्वतारोहण क्षेत्रमा नेपाललाई नयाँ उचाइमा पुर्याएको मानिन्छ।
विश्वको १२औँ अग्लो हिमाल मानिने ब्रड पिक कठिन तथा चुनौतीपूर्ण हिमालमध्ये एक हो। खराब मौसम, हिमपहिरो र प्राविधिक चुनौतीका कारण यस हिमालको आरोहण उच्च जोखिमपूर्ण मानिन्छ।
अधिकारीहरूले खोज तथा उद्धार अभियान जारी रहेको जनाउँदै टोलीको अवस्थाबारे थप जानकारी प्राप्त हुनेबित्तिकै सार्वजनिक गरिने बताएका छन्।
-
Jigyasanepal
